Astanada dúkenge túsip, kúzetshi áıeldi urǵan ury ustaldy
ASTANA. KAZINFORM – Elordalyq polıtseıler shaǵyn dúken tonaýshysyn ustady.
«Elordalyq polıtseıler tańerteń shaǵyn marketten energetıkalyq sýsyn urlaǵan qala turǵynyn ustap, ýaqytsha ustaý ızolıatoryna qamady. Uryny toqtatýǵa áreket jasaǵan kúzetshini (áıel) qaǵyp, pyshaqpen qorqytyp, qashyp ketken. Saryarqa aýdandyq Polıtsııa basqarmasynyń krımınaldyq polıtsııa qyzmetkerleri dereý kúdiktiniń izine túsip, buryn urlyq jasaǵany úshin sottalǵan 27 jastaǵy jigitti ustady», - delingen habarlamada.
Sondaı-aq, aqparatta tonaý faktisi boıynsha qylmystyq is qozǵalǵany aıtylǵan.
«Buzaqynyń elordada jasalǵan osyǵan uqsas basqa da qylmystarǵa qatysynyń bar-joǵy anyqtalýda», - deıdi polıtsııadan.
Astana qalasy Polıtsııa departamenti azamattardy zańsyz áreketterge barǵan jaǵdaıda dereý polıtsııaǵa habarlasýdy, qaýipsizdik maqsatynda qylmyskerlerdi ustaýǵa óz betinshe shara qoldanbaýdy eskertedi.
