Astanada áıeldi burynǵy kúıeýi pyshaqtap óltirdi
ASTANA. KAZINFORM — Astanada áıel pyshaq jaraqatynan kóz jumdy. Polıtsııa málimetinshe, qylmysqa onyń burynǵy kúıeýi kúdikti retinde tanyldy.
Astana qalasy Polıtsııa departamentine oqıǵa týraly habar 22 qyrkúıek kúni saǵat 20:00 shamasynda túsken.
Oqıǵa ornyna jetken polıtsııa qyzmetkerleri áıeldiń pyshaq jaraqatyn alǵanyn anyqtady. Ol alǵan jaraqatynan oqıǵa ornynda kóz jumǵan.
Kúdikti retinde marqumnyń burynǵy kúıeýi ustalyp, ýaqytsha ustaý ızolıatoryna qamaldy. Kisi óltirý faktisi boıynsha qylmystyq is qozǵalyp, tergeý amaldary júrgizilip jatyr.
Polıtsııa kúdikti týraly taraǵan aqparatqa da túsinikteme berdi.
— Kúdiktiniń polıtsııa qyzmetkeri ekeni týraly taraǵan aqparat shyndyqqa janaspaıdy, — dep málimdedi Astana qalasynyń Polıtsııa departamenti.
Tergeý barysy Polıtsııa departamenti basshylyǵynyń erekshe baqylaýynda.
Buǵan deıin Semeıde 19 jastaǵy qyzdyń ólimine qatysty qylmystyq is tergelip jatqany habarlanǵan edi. Polıtsııa dereginshe, kúdikti izin sýytpaı ustalǵan. Ol — 24 jastaǵy jergilikti turǵyn.
