Astanada áıeldi alty aı boıy mazalaǵan er adam stalkıng úshin sottaldy

ASTANA. KAZINFORM — Qala turǵyny jábirlenýshiniń onymen qarym-qatynas ornatqysy kelmeıtinin bile tura, alty aı boıy ony júıeli túrde ańdyǵan, dep habarlaıdy Astana qalasy prokýratýrasynyń baspasóz qyzmeti.

Baılanysty toqtatý týraly talaptardy, messendjerlerdegi buǵattaýdy, sondaı-aq qoldanystaǵy qorǵaý nusqamasyn elemeı, er adam jábirlenýshiniń turǵylyqty jáne jumys orny boıynsha ony qýdalaý arqyly, onyń kelisiminsiz beınejazbaǵa túsirip, psıhologııalyq qysym kórsetken.

Sotta memlekettik aıyptaýshy jábirlenýshiniń jeke bas bostandyǵyna, qaýipsizdigine jáne jeke ómiriniń qol suǵylmaýshylyǵyna quqyqtarynyń buzylýynan ákep soqqan sottalýshynyń kinásin dáleldeıtin tolyq ári jan-jaqty aıǵaqtar usyndy.

— Sot úkimimen ol stalkıng jasaǵany úshin kináli dep tanylyp, 100 saǵat qoǵamdyq jumystarǵa tartylyp, moraldyq zııandy óteýge mindetteldi. Atalǵan tulǵanyń buǵan deıin bostandyǵyn shekteý túrindegi jazany ótep, onyń sharttaryn buzǵanyn eskere otyryp, ótelmegen jaza bóligi bas bostandyǵynan aıyrý jazasyna aýystyryldy. Sot úkimi zańdy kúshine engen joq, — delingen habarlamada.

Aıta keteıik, zańsyz qýdalaý úshin 200 aılyq eseptik kórsetkishke deıin aıyppul salý, sol mólsherde túzeý jumystary, 200 saǵatqa deıin qoǵamdyq jumystarǵa tartý nemese 50 táýlikke deıin qamaýǵa alý túrindegi qylmystyq jaýaptylyq kózdelgen.

Budan buryn Batys Qazaqstanda stalkıng jasaǵan 2 adam sottalǵany belgili boldy.