Astanada áıel óliminen keıin tórt polıtsııa qyzmetkeri ustaldy
ASTANA. KAZINFORM – Astananyń 30 jastaǵy turǵyny óltirilgennen keıin tórt polıtsııa qyzmetkeri jumysyna salǵyrt qarady degen kúdikpen ustaldy.
Polıtsııa departamenti baspasóz qyzmeti habarlaǵandaı, Ózindik qaýipsizdik departamenti jaýapty laýazymdy tulǵalardyń is-áreketine qyzmettik tekserý júrgizdi. Onyń qorytyndysy boıynsha tórt qyzmetker jumystan shyǵaryldy.
- Qyzmetke nemquraıly qaraý faktisi boıynsha qylmystyq is qozǵaldy. Tergeý aıasynda polıtsııanyń burynǵy tórt qyzmetkeri ustaldy, - dep habarlady baspasóz qyzmeti.
Sonymen qatar birneshe polıtsııa qyzmetkeri laýazymynan bosatyldy. Olardyń qatarynda aýdandyq polıtsııa basqarmalarynyń eki bastyǵy, olardyń orynbasarlary, sondaı-aq Astana qalalyq Polıtsııa departamenti bastyǵynyń orynbasary bar.
Qalalyq PD bastyǵy men onyń taǵy bir orynbasary qatań tártiptik jaýapkershilikke tartyldy.
Osy oqıǵaǵa qytysty kúdikti izin sýytpaı ustalyp, ýaqytsha ustaý ızolıatoryna qamaldy. Qylmystyq isti tergeý jalǵasyp jatyr. Jasalǵan qylmysy úshin ol qatań jazaǵa tartylady.
Esterińizge sala keteıik, 23 qyrkúıek kúni keshke Astanada 30 jastaǵy áıel pyshaq jaraqatynan qaıtys boldy. Polıtsııanyń málimetinshe, kúdikti – burynǵy kúıeýi.
Polıtsııa sonymen qatar kúdiktiniń ishki ister organdarynyń qyzmetkeri ekeni týraly aqparatty joqqa shyǵardy.
