Astanada «Aıbyn-2026» halyqaralyq jıynyna joldama alǵan komandalar anyqtaldy
ASTANA. KAZINFORM — Elordadaǵy 68665 áskerı bóliminiń bazasynda XII Halyqaralyq «Aıbyn-2026» áskerı-patrıottyq jastar jıynynyń qalalyq irikteý kezeńi ótti, dep habarlaıdy Qorǵanys mınıstrliginiń baspasóz qyzmeti.
Іs-sharaǵa Qarýly kúshterdiń ardagerleri, «Jas sarbaz» áskerı-patrıottyq qozǵalysynyń ókilderi, qoǵam belsendileri jáne Almaty, Baıqońyr, Saryarqa, Nura, Esil jáne Saraıshyq aýdandarynan kelgen 130 jas patrıot qatysty.
Jarys baǵdarlamasyna pnevmatıkalyq vıntovkadan atý, kúsh jattyǵýlary, avtomatty jartylaı bólshekteý jáne jınaý, arqan tartý, áskerı-sporttyq estafeta, kross, Smart Sarbaz robototehnıka jarysy sekildi áskerı-qoldanbaly jáne ıntellektýaldyq saıystar endi.
— «Aıbyn» áskerı-patrıottyq jıyny jasóspirimderde patrıotızm men jaýapkershilik sezimin qalyptastyryp, olardyń jan-jaqty damýyna yqpal etedi. Bul jastar forýmy 2015 jyldan beri ótkizilip keledi jáne osy ýaqyt ishinde tájirıbe almasýǵa arnalǵan halyqaralyq alańǵa aınaldy, — dedi Qarýly Kúshter ardagerleri RQB tóraǵasynyń orynbasary otstavkadaǵy general-maıor Marat Naǵumanov.
Astanalyq «Jas sarbaz» balalar-jasóspirimder áskerı-patrıottyq qozǵalysy fılıalynyń tóraǵasy Aıdarhan Mahanbet te jastardyń halyqaralyq jıynda Astananyń namysyn abyroımen qorǵaıtynyna senim bildirdi. Óıtkeni olardyń mundaı jarystarǵa qatysý tájirıbesi bar.
— Ótken jyly men Aqtóbe qalasynda ótken halyqaralyq jıynǵa qatystym. Endi Şýchınsk qalasynda elordanyń namysyn qorǵaımyz. Bul jarystarǵa qatysý meniń mamandyq tańdaýymda úlken ról atqardy. Quqyq qorǵaý organdarynda qyzmet etkim keledi, — dedi № 87 mektep oqýshysy Asylym Toqybaeva.
Jarys qorytyndysy boıynsha jalpykomandalyq esepte Esil — Nura aýdandarynyń komandasy birinshi oryndy ıelendi, Saryarqa — ekinshi, Baıqońyr — Saraıshyq — úshinshi orynǵa turaqtady. Jeńimpazdar men júldegerler kýboktarmen, al qatysýshylar medaldarmen, alǵys hattarmen jáne estelik syılyqtarmen marapattaldy.
Іrikteýden sátti ótken komandalar 21–27 maýsym aralyǵynda Shoqan Ýálıhanov atyndaǵy Áskerı kolledjdiń Şýchınsk qalasyndaǵy «Amandyq» polıgonynda ótetin «Aıbyn» halyqaralyq jıynynyń fınalynda Astana namysyn qorǵaıdy.
Buǵan deıin Býrabaıda ótetin halyqaralyq «Aıbyn» jıynyna 6 eldiń komandalary qatysatynyn jazǵanbyz.
