Astanada aıazǵa baılanysty qyzmetkerler jumys istemeıtini jóninde jalǵan aqparat tarady
ASTANA. QazAqparat - Astanada belgisiz bireýler búgin aıazǵa baılanysty qyzmetkerler jumys istemeıtini jóninde habarlama taratqan, dep habarlaıdy QazAqparat.
Búgin WhatsApp messendjerinde mynadaı aqparat paıda boldy: «Astana ákimdigi habarlaıdy: aýa raıynyń buzylýyna baılanysty qala mekemelerinde barlyq deńgeıdegi qyzmetkerler úshin jumys bolmaıdy».
Osyǵan baılanysty qala ákiminiń baspasóz hatshysy Elmıra Júrgenbaeva Feısbýktegi paraqshasynda jazba jarııalady.
«Qurmetti qala turǵyndary men qonaqtary! WhatsApp-ta osyndaı aqparat tarap jatyr. Ol shyndyqqa sáıkes kelmeıdi! Ótinemiz, mundaı málimetterdi Astana qalasynyń resmı saıtynda nemese 109 Ikomek qyzmeti arqyly anyqtap, tekserip otyryńyzdar», - dep jazdy baspasóz hatshysy.
Eske sala keteıik, búgin Astana qalalyq tótenshe jaǵdaılar departamenti mekeme jáne uıym basshylaryna 25 jeltoqsan kúngi jumys ýaqytyn qysqartý jóninde usynys jasaǵan bolatyn.
