Astanada aıazdy kúnderi «tegin taksı» jumys isteıdi
ASTANA. QazAqparat - Mundaı múmkindikti elordalyqtarǵa «Astana - meıirimdi qala» jobasy aıasynda «Nur Astana» meshiti syılady, dep habarlaıdy qalalyq ákimdiktiń resmı saıty.
«Nur-Astana» meshitiniń bastamasymen aıaldamalarda qoǵamdyq kólikterdi kútip qalǵan qala turǵyndary tıisti meken-jaılaryna tegin jetkizý naýqany júzege asyrylýda. Meshittiń ustazy Ilıas Otarovtyń aıtýynsha, aktsııaǵa qatysatyn avtokólikter arnaıy logotıppen belgilenedi.
«Bizdiń naýqanymyzdyń basty maqsaty - aıazdy kúnderde kómekke muqtaj adamdardy qoldaý. «Nur Astana» meshitiniń turaǵynda aktsııaǵa qatysýǵa nıet bildirgen kólik ıelerine turǵyndardy jetkizý erejeleri jazylǵan broshıýralardy taratyp, olardy túsindiremiz. «Astana - meıirimdi qala» logotıpin japsyramyz. Bul avtokólikterdi turǵyndar birden baıqaıtyn bolady. Kómek qolyn sozýǵa daıar júrgizýshiler sany kún saıyn artatyn bolatynyna senemin», - deıdi Ilıas Otarov.
«Astana - meıirimdi qala» jobasy aıasynda «Nur Astana» meshitiniń qyzmetkerleri aldaǵy kúnderi halyqtyń áleýmettik osal toptaryna jatatyn otbasylarǵa kómir jetkizý sharalaryn qolǵa alady dep kútilýde.
Eske salaıyq, búgin Qazaqstan musylmandary dinı basqarmasy tóraǵasynyń birinshi orynbasary, naıb múftı Naýryzbaı qajy Taǵanulynyń bastamasymen «Haziret Sultan» respýblıkalyq meshiti «Astana - meıirimdi qala» jobasy júzege asyryla bastady.
Aktsııa aıasynda kóshelerde jumys istep júrgen Astana qalasynyń kommýnaldyq qyzmetteriniń jumysshylaryna ystyq taǵamdar men shaı taratyldy. Respýblıkalyq meshittiń málimeti boıynsha, «Astana - meıirimdi qala» jobasy qys boıy ótkiziletin bolady. Aldaǵy ýaqytta oǵan elordanyń barlyq meshitteri qosylady.
Aıta keteıik, Astanada aıazdy aýa raıynyń turaqtanǵanyna birneshe kún boldy. Aýa temperatýrasy -40 gradýsqa deıin tómendedi. Mektepter men kolledjderdegi sabaqtar da osy sebepterge baılanysty ýaqytsha ótkizilmeıtin boldy.
