Astanada aıazda kóshede júrgen úsh jasar balanyń ata-anasy tabyldy
ASTANA. QazAqparat - Astanada joǵalyp ketken balanyń ata-anasy tabyldy. Bul týraly Astana ákimdiginiń baspasóz hatshysy Elvıra Júrgenbaeva habarlady.
Aıta keteıik, osyǵan deıin Astana qalalyq Polıtsııa depratamenti Kereı Jánibek handar kóshesindegi turǵyn úıdiń aýlasynan tabylǵan úsh jasar balanyń ata-anasyn izdestirip jatqandyǵyn habarlaǵan bolatyn. Keıinirek bala aman-esen tabylyp, Saýran kóshesindegi №13 polıtsııa bólimshesine jetkizilgeni habarlandy.
Al keshirek, Astana ákimdiginiń baspasóz hatshysy Elvıra Júrgenbaeva Feısbýk jelisindegi paraqshasynda balanyń ata-anasy da tabylǵanyn habarlady.
«Balanyń ata-anasy tabyldy, olar jumystarynda bolǵan. Al bala týystarynyń úıinde bolǵan. Balanyń aǵasy jumysqa shyǵyp ketkende ekinshi aǵasy uıyqtap jatqan, sol sátte bala óz betimen syrtqa shyǵyp ketken. Uıqydan oıanǵan aǵasy balany úlken aǵasy alyp ketti dep oılaǵan. Qazir bala anasynyń janynda. Ata-analarǵa balalaryna muqııat bolýdy taǵy da eskertemiz»,-dep jazdy baspasóz hatshysy.
