Elordada aıaz ben kóktaıǵaq kúsheıdi: Bas travmatolog turǵyndarǵa úndeý jasady

ASTANA. KAZINFORM — Elordada aıaz kúsheıip, kóktaıǵaq ornap, jel ekpini artty. Osyǵan baılanysty Astana qalasy Qoǵamdyq densaýlyq saqtaý basqarmasynyń shtattan tys bas travmatologi Alekseı Solod turǵyndardy saqtyq sharalaryn qatań saqtaýǵa jáne kóshede júrgende erekshe saq bolýǵa shaqyrdy.

Mamannyń aıtýynsha, eń aldymen aıaq kıimdi durys tańdaý mańyzdy. Kóktaıǵaq kezinde bıik óksheli aıaq kıimniń ornyna, tabany taımaıtyn aıaq kıim kııý usynylady.

Sondaı-aq úıden shyǵatyn ýaqytty aldyn ala josparlap, asyqpaı júrý qajet. Qozǵalys kezinde shaǵyn qadam jasap, qoldy qaltaǵa salmaǵan jón jáne múmkindiginshe aýyr sómkeler asynbaý qajet, ol tepe-teńdikti ustaýǵa kómektesedi.

— Egde jastaǵy adamdar ushy rezeńke nemese temir qaptamaly taıaq paıdalanǵany durys. Qosymsha tirek retinde shańǵy taıaǵyn qoldanýǵa da bolady. Muz qatqan ári jaryqtandyrylmaǵan jerlerden aýlaq bolǵan jón. Eger qulaýdyń aldyn alý múmkin bolmasa, aýyr jaraqat alý qaýpin azaıtý úshin tizeni búgip, arqamen emes, qyrynan qulaýǵa tyrysqan durys. Qulaǵannan keıin birden turyp ketýge bolmaıdy. Bas aınalý nemese qatty aýyrsyný baıqalsa, aınaladaǵy adamdardan kómek suraý qajet, — dedi ol.

Aýyr jaraqat alǵan jaǵdaıda dereý bilikti medıtsınalyq kómekke júginý mańyzdy.

Qala ákimdiginiń málimetinshe, shuǵyl jaǵdaılarda eresekterge kópbeıindi qalalyq № 3 jáne № 1 aýrýhanalarda, balalarǵa kópbeıindi qalalyq balalar aýrýhanasy № 2-de, sondaı-aq № 2 emhana bazasynda medıtsınalyq kómek kórsetiledi.

Budan buryn Jańa jyl merekesindegi saqtyq sharalary týraly jazǵan edik.