Astanada aıaz bastalǵaly 7 kólik órtendi
ASTANA. QazAqparat - Sońǵy birneshe kúnde elordada 7 kólik órtendi. Bul jaıynda QR ІІM Tótenshe jaǵdaılar komıtetiniń resmı ókili Rýslan Imanqulov aıtty, dep habarlaıdy QazAqparat.
«20-22 qańtar kúnderi Astana qalasynyń aýmaǵynda kólik órtenýiniń 7 deregi tirkeldi. 5 kóliktiń elektr symdary júıesi qysqa tuıyqtalǵanymen órt shyqqan joq. Naqty aıtar bolsaq, tek 22 qańtar kúni ǵana saǵat 07-31-den 17-40-qa deıin qalanyń eki aýdanynda «ToyotaLandCruiserPrado», «AudiA6», «Hyundai Elantra», «Volkswagen Transporter», «Toyota Carina» kólikteri órtendi. Zardap shekkender men qaza tapqandar joq», - dedi Rýslan Imanqulov.
Onyń aıtýynsha, kólikterdiń órtenýine elektr symdary júıesindegi aqaýlar men qozǵaltqyshty qyzdyrý úshin ot paıdalaný negizgi sebep bolyp otyr.
«Kóliktegi órt eleýsiz bastalýymen óte qaýipti. Buǵan qosa, órttiń taralýy óte jyldam júredi. Eger órt shyqsa, onda eń aldymen múmkindiginshe kólikti adamdar men nysandardan alysyraq toqtaý qajet. Sodan keıin qozǵaltqyshty óshirip, jolaýshylardy túsirip, qol tejegishti iske qosyp, barlyq qujattardy alyp, kólikten shyǵý qajet. Bul oraıda kólik salonynda 90 sekýndtan arttyq bolmaý da óte mańyzdy», - dep keńes beredi TJK ókili.
Onyń aıtýynsha, kólikten shyqqannan keıin órttiń qaı jerden bastalǵanyn tabýǵa tyrysqan jón. Eger ot benzın bagyna taqaý bolsa, onda birden qaýipsiz aralyqqa qashqan durys. Óıtkeni, kez kelgen sekýndta jarylys oryn alýy yqtımal. Al órt kapot astynda bolsa, onda ony barynsha abaılap ashý kerek. Sebebi aýa kirgen kezde órt kúsheıip ketýi múmkin.
