Astanada Aıaz atanyń poshtasy isteı bastady
ASTANA. QazAqparat - Esil ózeni jaǵasynda «Atyraý» kópiriniń mańynda Aıaz atanyń ertegidegideı rezıdentsııasy ashyldy. Oǵan balalar úıiniń 6-11 jas aralyǵyndaǵy tárbıelenýshileri keldi, dep habarlaıdy QazAqparat Astana ákimdiginiń saıtyna silteme jasap.
Rezıdentsııa aldynda olardy qarsy alǵan anımatorlar kvest oıynyn oınatyp, poshta bólimshesine ákeldi. Ol jerde balalar jazǵan hattaryn jáshikke saldy jáne barlyǵy otyryp ortaq hat jazdy. Ortaq hatta Jańa jyldyń jaqsylyq, qýanysh, baqyt ákelýin tiledi. Bul úlken hatty elf ıt jegilgen shanamen Aıaz ataǵa alyp ketti.
«Jastar» saraıy dırektorynyń orynbasary ıÝlııa Amırovanyń aıtýynsha, balalardyń qalaýy jazylǵan syılyqtar tizimi ákimdikke tabys etilgen.
«Osy jerde birinshi - altynshy synyptarda oqıtyn oqýshylar keldi. Balalar úıiniń barlyq tárbıelenýshileri Aıaz ataǵa hat jazdy. Ótken jyly da osylaı jasadyq, árkim ózi qalaǵan syılyǵyn aldy. Bireýi konkı, qýyrshaq úıshigin suraıdy, eresek balalardyń tilegi kúrdeli. Mysaly, velosıped suraıdy. Negizinen, qysta balalar konkı, shana, shańǵy alǵysy keledi. Bizde Aqkól kentiniń ar jaǵynda ózimizdiń muz aıdynymyz bar, ony eresek balalar quıady», - dedi balalar úıiniń aǵa tárbıeshisi Tatıana Fenına.
Balalardy Astana qalasy mádenıet jáne sport basqarmasy basshysynyń orynbasary Narıma Muhambetalına men «Jastar» saraıynyń dırektory Sergeı Solodovnıkov Jańa jylmen jáne aldaǵy demalyspen quttyqtady.
Hattaryn tabystaǵan soń balalar as iship, alyp alańda syrǵanaq tepti, sýretke tústi.
Aıta keterligi, Aıaz Atanyń ertegidegideı rezıdentsııasy 30 jeltoqsanǵa deıin jumys isteıdi, kirý tegin. Al «Aıaz Atanyń poshtasy», «Qysqy dala oıyn-saýyqtary», «Aıaz Atanyń qonaq bólmesine» bıletpen kirýge bolady.
