Astanada aıaldamany qıratyp ketkender 10 táýlikke qamaldy
ASTANA. KAZINFORM — Astanada qoǵamdyq tártipti buzý men vandalızmniń kez kelgen túrine qarsy júıeli jumys jalǵasyp jatyr. Quqyq qorǵaý organdary aıaldama pavılonyn qıratyp ketken kezekti tártip buzǵandardy anyqtap, jaýapqa tartty.
Aıaldamada túngi ýaqytta orynsyz áreket jasap, shý shyǵarǵan úsh jas jigit ustaldy. Olardyń biri ekinshisin ıterip jiberip, ol qulap bara jatyp pavılonnyń shyny esigin syndyrǵan.
Habar túsken soń polıtsııa jasaǵy dereý oqıǵa ornyna jetti. Tártip buzýshylar jaqyn mańdaǵy aýlalardyń birinen tabylyp, polıtsııa bólimshesine jetkizildi.
Sot sheshimimen olardyń ekeýi bótenniń múlkin búldirgeni úshin ákimshilik jaýapkershilikke tartylyp, árqaısysy 10 táýlikke qamaýǵa alyndy. Úshinshi vandal túngi ýaqytta tynyshtyqty buzǵany úshin jaýapqa tartyldy.
Polıtsııa ókilderi elordada ornatylyp jatqan jyly aıaldamalar turǵyndardyń qys mezgilinde qoǵamdyq kólik kútýi úshin jasalǵanyn, sondyqtan qala múlkine uqypty qaraý qajet ekenin eske saldy. Qalalyq ınfraqurylymdy búldirý qalanyń kelbetine zııan keltiredi. Kez kelgen quqyqbuzýshylyq pen keltirilgen shyǵyn qoldanystaǵy zańnamaǵa sáıkes jaýapkershilikke ákeletini atap ótildi.
Aıta ketelik Astanada jyl basynan beri vandalızmge barǵan 160 adam jazalandy.