Astanada aıaldamalar elektrondy aqparattandyrý quraldarymen jabdyqtalady
ASTANA. QazAqparat - Elorda turǵyndary men qonaqtarynyń basym bóligi qoǵamdyq kólikti paıdalanady. Jolaýshylarǵa qolaıly jaǵdaı jasaý maqsatynda udaıy jaıly avtobýstar satyp alynady, marshrýttyq jeliler keńeıtiledi, aıaldamalar da jabdyqtalady.
Qazirgi ýaqytta Kenesary kóshesi, Respýblıka jáne Qabanbaı batyr dańǵyldarynda ornalasqan aıaldamalarda qalalyq jolaýshylar kólikteriniń júrý baǵyttarynyń kesteleri kórsetilgen. Biraq ol qosymsha aqparat bermeıdi. Astana qalasynyń Jolaýshylar kóligi jáne avtomobıl joldary basqarmasynan astana.kz saıtyna habarlaǵandaı, osyǵan baılanysty búginde jańa elektrondy aqparattandyrý jobasy ázirlenip jatyr. Joba belgili bir qalalyq avtobýstyń marshrýtyn jáne onyń aıaldamalarǵa toqtaý ýaqytyn baqylaýǵa múmkindik beredi. Atalǵan joba keler jyly júzege asyrylmaq.
Aıta keteıik, Astanada 956 aıaldama pýnkti bar, sonyń ishinde 592 eýropalyq standarttarǵa saı pavılondarmen jabdyqtalǵan. Sondaı-aq, 8 avtopark 50 baǵyt boıynsha qyzmet kórsetedi. Kásiporyndarda 890 avtobýs jumys isteıdi. Ústimizdegi jyly bul kórsetkish 350 birlikke ulǵaıtylmaq.
