Astanada aıaldamaǵa temir laqtyrǵan, kóliktiń áınegin urǵan vandaldar jazalandy

ASTANA. KAZINFORM — Elordalyq polıtseıler vandalızm aktilerimen jáne qoǵamdyq tártipti buzýshylarmen kúresti jalǵastyryp jatyr. Osy oraıda ózgeniń múlkine zııan keltirgen kezekti vandaldar jaýapqa tartyldy, dep habarlaıdy Astana ákimdiginiń resmı saıty. 

Atap aıtar bolsaq, 22 qarasha kúni saǵat 9.00-de 30 jastaǵy er adam kóshede turǵan kóliktiń artqy esigine zaqym keltirgen. Sol kúni keshke 34 jastaǵy mas adam tóbeles kezinde kóliktiń esigine japsarlas ornalasqan áınekti syndyryp ketken. Sondaı-aq 26 qarasha kúni túnde 22 jastaǵy azamattyń aıaldamaǵa temir laqtyryp, áınegin shaqqany belgili boldy. QR ÁQBtK-niń 147-1-baby boıynsha barlyq quqyq buzýshy tabylyp, ákimshilik jaýapkershilikke tartyldy. 

Jyl basynan beri Astanada eriktiler, belsendiler, belgili sportshylar, qala turǵyndary qoldaǵan «Toqta, vandal» aktsııasy aıasynda profılaktıkalyq jumystar júrgizilip keledi. Aktsııanyń basty maqsaty – vandalızmniń kez kelgen kórinisin boldyrmaý jáne elordada tazalyq pen tártipti saqtaý.  

Jyl basynan beri sot bótenniń múlkin qasaqana búldirgeni úshin, jalpy paıdalaný oryndaryn lastaǵany úshin, ǵımarattar men turǵyn úı-jaılardy búldirgeni úshin 300-ge jýyq adamdy jazalady. Olardyń barlyǵy jaýapqa tartyldy. 

Aıta keteıik, vandalızmniń aldyn alý jumystary qalalyq prokýratýra men polıtsııa departamentiniń úılestirýimen júrgiziledi.