Astanada aıaldamaǵa soǵylǵan avtobýstyń júrgizýshisi jazalandy
ASTANA. QazAqparat - «Astana LRT» kompanııasynyń baspasóz qyzmeti aıaldama pavılonyna kirip ketken avtobýstyń júrgizýshisine qatysty qandaı shara qabyldanǵanyn málim etti, dep habarlaıdy QazAqparat tilshisi.
Eske sala ketsek, elordada 5 aqpan kúni qoǵamdyq kólikterdiń biri aıaldama pavılonyna soǵylyp, jol-kólik oqıǵasy saldarynan 1 adam jaraqat alǵan bolatyn.
«Atalǵan oqıǵa boıynsha Polıtsııa departamentiniń ákimshilik polıtsııa basqarmasynyń qyzmetkerleri ákimshilik hattama toltyrdy. Avtobýstyń júrgizýshisi buryn jol-kólik oqıǵasyna túspegen. Kólik júrgizýshisi retinde alty jyl tájirıbesi bar. Avtopark basshylyǵy júrgizýshini qyzmetinen aıyryp, qara tizimge engizý týraly sheshim qabyldady. Ol degenińiz atalmysh júrgizýshiniń elordadaǵy qoǵamdyq kólikte jumys atqara almaıtynyn bildiredi», - dep habarlady kompanııanyń baspasóz qyzmeti redaktsııanyń saýal hatyna bergen jaýabynda.
Avtory: Azamat Syzdyqbaev
