Astanada aıaqtalǵan bokstan áıelder arasyndaǵy Azııa chempıonatynda Qazaqstan qyzdary komandalyq esepte bas júldeni jeńip aldy
ASTANA. Mamyrdyń 31-i. QazAqparat - Astanada aıaqtalǵan bokstan áıelder arasyndaǵy Azııa chempıonatynda Qazaqstan qyzdary komandalyq esepte bas júldeni jeńip aldy.
El komandasy 4 altyn, bir kúmis, úsh qola júldege ıe boldy, dep habarlaıdy QazAqparat.
Bir apta boıy ótken baıraqty básekege Azııanyń kóptegen elderinen tájirıbeli sportshylar qatysty. Ásirese, Qazaqstan, Qytaı, Koreıa Halyq Demokratııalyq Respýblıkasynyń boksshy qyzdary joǵary nátıje kórsetti. Sondaı-aq Tájikstan, Úndistan, Mońǵolııa elderiniń arýlary da jaqsy daıyndyqtaryn baıqatty.
Fınaldyq kezdesýge Qytaı men Soltústik Koreıa komandalarynan 6 sportshydan shyqty. Al elimizdiń bes arýy altyn júlde úshin tartysqa tústi.
Azııa birinshiliginde Jaına Shekerbekova (54 kg.), Saıda Qasenova (64 kg.), Darıǵa Shákimova (75 kg.), Marına Volnova (81 kg.) jeńimpaz atandy. Al tájirıbeli boksshy Nazgúl Boranbaeva (48 kg.) kúmis júldeni ıelendi.
Sońǵy jarys kúnindegi dodany kórýge arnaıy kelgen QR Premer-Mınıstri Kárim Másimov 64 keli salmaqta óner kórsetken Saıda Qasenovaǵa altyn júldeni tabys etti. Ózge salmaqtaǵy jeńimpazdardy QR Parlamenti Senaty Tóraǵasynyń orynbasary Muhambet Kópeev, Qazaqstan boks federatsııasynyń prezıdenti Tımýr Qulybaev jáne basqa da resmı tulǵalar marapattady.
