Astanada aıaq kıim qorabynan esirtki salynǵan oramalar tabyldy
ASTANA. KAZINFORM — Astanada polıtsııa esirtki zattaryn saqtap, taratty degen kúdikpen 26 jastaǵy er adamdy ustady. Kúdikti eki jasyryn orynnan esirtki alyp jatqan jerinde qolǵa túsken.
Jedel is-shara barysynda polıtseıler atalǵan oryndardan qala aýmaǵynda taratýǵa arnalǵan tyıym salynǵan zattar salynǵan 100-den astam orama tárkiledi.
Keıin kúdiktiniń turǵylyqty jeri tintildi. Páterden aıaq kıim qorabynyń ishine jasyrylǵan, aq tústi untaq tárizdi, ózine tán ıisi bar zat salynǵan qosymsha oramalar tabyldy. Aldyn ala málimet boıynsha, olardyń quramynda mefedron men alfa-PVP bolýy múmkin. Oramalardyń syrty túrli tústi oqshaýlaǵysh taspamen oralǵan.
— Barlyq zat tárkilendi. Atalǵan fakti boıynsha qylmystyq is qozǵalyp, kúdikti ýaqytsha ustaý ızolıatoryna qamaldy, — delingen habarlamada.
Polıtsııa qylmysqa qatysy bar ózge de adamdardy anyqtap jatyr.
Quqyq qorǵaý organdary esirtki zattaryn saqtaý, ótkizý jáne taratqany úshin qylmystyq jaýapkershilik qarastyrylǵanyn eske saldy.
Eske salaıyq, munyń aldynda Jambyl oblysynda 438 keli qarasora ósirgen kúdikti ustalǵanyn habarlaǵan edik.
