Astanada avtoturaqta turǵan bes kólik órtendi
ASTANA. KAZINFORM – Astananyń Saraıshyq aýdanynda turǵyn úı kesheniniń janyndaǵy avtoturaqta bes jeńil avtokólik órtendi.
Oqıǵa A. Baıtursynuly kóshesinde bolǵan.
Qutqarýshylardyń alǵashqy bólimsheleri oqıǵa ornyna jetken kezde, kólikterdiń barlyǵy ashyq jalynmen janyp jatqan. Qatty jeldiń saldarynan jalyn bir-birine jaqyn turǵan kólikterge tez taraǵan.
– Oqıǵa ornyna órt sóndirýshiler 7 mınýt ishinde jetip, órtti jedel túrde sóndirdi. Qazirgi ýaqytta órttiń shyǵý sebebi anyqtalyp jatyr. Qatty jel kezinde ottyń taralýy óte jyldam bolýy múmkin. Órt belgilerin baıqasańyz, dereý 112 nómirine habarlasyńyz, – delingen TJM habarlamasynda.
Aıta keteıik, buǵan deıin Astana qalasynyń Tótenshe jaǵdaılar departamenti jyl basynan beri elordada 102 avtokólik órtengenin habarlaǵan. Mamandardyń málimetinshe, kóliktegi órtterdiń 85%-y elektr symdarynyń qysqa tuıyqtalýynan bolady.
