Astanada avtoturaq jetispeıdi: Ákim Prezıdentten sóz estidi

ASTANA. QazAqparat - Qazaqstan Prezıdenti Nursultan Nazarbaev elordada avtoturaq máselesi sheshilmegeni úshin Astana ákimi Áset Isekeshevti synǵa aldy, dep habarlaıdy «QazAqparat» HAA tilshisi.

«Nurjol býlvary kólikke tolyp tur, Úkimet úıi men ákimdiktiń aldynda da sol jaǵdaı. Kóz aldyńda - terezeńdi ashyp qarasań - beı-bereket?!», - dedi Memleket basshysy elordany odan ári damytý máseleleri jónindegi májiliste.

Budan keıin sóz alǵan ákim atalǵan máseleni sheshý úshin naqty jobalar júzege asyrylyp jatqanyn aıtty.

«Bıyl «Ákimdik, TsÝM aldyndaǵy turaqtar» atty 2 myń oryndyq jobalar bastalady. «Nurjol» aldynda aqyly avtoturaqtyń jobasy engizildi», - dedi ákim.

Buǵan qatysty sóılegen Elbasy máseleni sheshýde naqty tártiptiń joqtyǵyn aıtty.

«Avtoturaqtar boıynsha biz naqty jumystardy iske asyrýymyz kerek. Barlyq qurylys salýshylardy jerasty turaqtaryn salýǵa mindetteýge tıispiz. Astanadan da úlken qalalar bar, biraq olar bul máseleni tıimdi sheship jatyr...  Bizde tártip joq. Avtoturaq úshin aqsha alyp jatqan joqsyńdar. «Mersedes» úshin aqsha bar ma, demek saǵat boıynsha avtoturaqqa tóleýge de aqsha bar degen sóz. Tártipke baǵynbaǵandardyń bárine qatań túrde aıyppul tóletý kerek», - dedi Prezıdent.

Prezıdenttiń aıtýynsha, qolǵa alynǵan naqty sharalar avtoturaq aýmaǵy máselesin sheshýge múmkindik beredi.

«Qalada avtoturaqtar máselesiniń sheshilmeýi saldarynan jedel járdem de, órt sóndirýshiler de ǵımaratty aınala almaı qalady», - dedi Nursultan Nazarbaev.