Astanada avtorlyq jáne sabaqtas quqyqtardy ujymdyq basqarý jóninde semınar ótti

Eki kúnge jalǵasqan sharany Dúnıejúzilik zııatkerlik menshik uıymy QR Ádilet mınıstrliginiń Zııatkerlik menshik quqyǵy komıtetimen birlese otyryp, sondaı-aq Avtorlar men kompozıtorlar qoǵamdarynyń halyqaralyq konfederatsııasynyń jáne Qaıta shyǵarý jónindegi uıymdardyń halyqaralyq federatsııasynyń yntymaqtasýymen uıymdastyrdy. Sonymen qatar, jıyndy ótkizýge «Abyroı» avtorlyq qoǵamy», «Qazaqstan oryndaýshylarynyń quqyqtaryn basqarý qoǵamy» Respýblıkalyq qoǵamdyq birlestikteriniń jáne «Ulttyq reprografııalyq quqyqtar jónindegi qoǵamy» qoǵamdyq birlestigi qoldaý bildirgen.

Semınar barysynda sóz sóılegen QR Ádilet mınıstriniń orynbasary Ámirhan Amanbaev basqosýdyń Zııatkerlik menshik quqyǵy komıtetiniń qurylǵanyna 10 jyl tolýyna sáıkes kelgenin aıtyp, ótken onjyldyqta atqarylǵan sharalarǵa da sholý jasap ótti. «Ótken 10 jyl ishinde Komıtet negizgi halyqaralyq aktilerge sáıkes keletin ulttyq zańnamany qalyptastyrý boıynsha úlken jumystar atqardy. Bul baǵyttaǵy jumys áli de jalǵasa túsedi. Al endigi kúni Birińǵaı ekonomıkalyq keńistikti qalyptastyrýǵa jáne Qazaqstannyń Dúnıejúzilik saýda uıymyna enýi boıynsha kelissózder ótkizýge baılanysty zııatkerlik menshikti barabar qorǵaýdy qamtamasyz etýdiń mańyzdylyǵy artyp otyr. Bul rette memlekettik organdardyń deklaratıvti normalar qabyldaýy jetkiliksiz ekendigin, olardyń jumys tıimdiligin arttyra túsý qajettigin basa aıtqym keledi», - dedi Á. Amanbaev. Sonymen qatar, eki kúndik semınar barysynda avtorlyq quqyq jáne ujymdyq basqarý máseleleri, zamanaýı mindetter jáne zańnamadaǵy sońǵy ózgerister jaıynda sóz bolyp, baspalyq iste mátindik máseleni, beıne jumystarda quqyqtardy basqarý máseleleri talqyǵa tústi. Qatysýshylar dybystaý beıneleý týyndylaryn reprografııalyq qaıta shyǵarý boıynsha, sondaı-aq Birińǵaı ekonomıkalyq keńistiktiń qatysýshy memleketterinń zııatkerlik menshikti qorǵaý boıynsha ózara is-áreketteri týraly áńgime órbitip, pikir almasty.