Astanada avtoparkterdiń 11 laýazymdy tulǵasy ákimshilik jaýapqa tartyldy
ASTANA. QazAqparat - 16-23 qyrkúıek aralyǵynda Astana qalasynyń polıtseıleri qoǵamdyq kólik júrgizýshileri arasynda kólik tártibin arttyrý jáne jol qaýipsizdigin qamtamasyz etý maqsatynda «Avtobýs» jedel-aldyn alý is-sharasyn ótkizdi, dep habarlaıdy QazAqparat.
Astana qalalyq Polıtsııa departamenti baspasóz qyzmetiniń habarlaýynsha, jedel aldyn alý sharasy bastalǵannan beri jolaýshy tasymaldaýshylarynyń 600-ge jýyq jol erejesin buzǵany anyqtaldy. Onyń ishinde, kólikti zańsyz qaıta jabdyqtaýdyń 3 faktisi, jolaýshylardy zańsyz tasymaldaýdyń 17 faktisi, basqarý kezinde uıaly telefon paıdalanǵan 20 júrgizýshi jáne manevr jasaý erejelerin buzýdyń 27 faktisi anyqtaldy.
Polıtseıler aqaýy bar, sondaı-aq zańsyz qaıta jabdyqtalǵan avtokólikti paıdalanýǵa tyıym salynǵanyn eske salady. Reıd barysynda 15 avtokólikten memlekettik tirkeý nómiri belgileri alyndy, mamandandyrylǵan kommýnaldyq turaqqa 21 aqaýy bar jáne qaıta jabdyqtalǵan kólik ornalastyryldy.
Jedel aldyn alý is-sharasy barysynda avtobýs parkteri men avtovokzaldar tekseriledi. 400-den astam reıstik avtobýstar tekserildi, onda otyn berý júıeleri, elektr jabdyqtarynyń qurylǵylary men paıdalanylýy jáne órt sóndirý quraldarynyń bolýy nazarǵ alynady.
«Tehnıkalyq aqaýy bar marshrýttyq avtobýstardy paıdalanýǵa bergeni úshin avtoparkterdiń 11 laýazymdy tulǵasy ákimshilik jaýapqa tartyldy. Sondaı-aq, taksomotorlyq kásiporyndardyń 7 laýazymdy tulǵasy reıs aldyndaǵy jáne mindetti medıtsınalyq tekserýden ótkizbeı taksı avtokólikterin shyǵarǵany úshin QR ÁQBK 590-babynyń 8-bóligi boıynsha jaýapqa tartyldy»,-delingen habarlamada.
