Astanada avtomobıl joldarynyń bólingen jolaǵynda qurylys salýǵa tyıym salyndy
ASTANA. KAZINFORM — Astana qalasynyń máslıhaty 2026 jylǵy 20 tamyzdaǵy sheshimimen elordanyń sáýlettik kelbetin qalyptastyrý jáne qala qurylysyn josparlaý qaǵıdalaryna ózgerister engizdi.
Atap aıtqanda, úsh qabatqa deıingi turǵyn nemese qoǵamdyq ǵımarattardyń (jer deńgeıinen shatyr jotasyna deıingi bıiktigi 12 metrden aspaıtyn) arasyndaǵy eń az araqashyqtyq ınsolıatsııa normalaryna jáne órtke qarsy belgilengen araqashyqtyqtarǵa sáıkes aıqyndalatyny naqtylandy.
Sonymen qatar qaǵıdalar jańa tarmaqtarmen tolyqtyryldy. Oǵan sáıkes, jalpyǵa ortaq paıdalanylatyn avtomobıl joldarynyń bólingen jolaǵy sheginde ǵımarattar men qurylystar salýǵa, sondaı-aq ınjenerlik kommýnıkatsııalar júrgizýge jol berilmeıdi.
Bul talap jol qyzmeti nysandaryna, syrtqy (kórneki) jarnamaǵa, polıtsııa beketterine, sanıtarııalyq-epıdemıologııalyq baqylaý, keden, shekara jáne kólik baqylaýy beketterine, veterınarııalyq jáne fıtosanıtarııalyq baqylaý beketterine qoldanylmaıdy. Sondaı-aq antenna-dińgek qurylystaryn nemese uıaly jáne spýtnıktik baılanys jabdyqtaryna arnalǵan tirekterdi, avtomattandyrylǵan ólsheý stantsııalaryn jáne talshyqty-optıkalyq baılanys jelilerin ornalastyrýǵa ruqsat etiledi.
Budan bólek, K-1 aınalma jolynyń soltústik bóliginde, Óndiris tasjoly boıynda, K-1 aınalma jolynyń soltústik-shyǵys bóliginde, Alash tasjoly boıynda, aınalma joldyń shyǵys bóliginde jáne Astana — Qaraǵandy tasjoly boıynda egjeı-tegjeıli josparlaý jobalarymen, magıstraldyq ınjenerlik jelilermen jáne áleýmettik ınfraqurylymmen qamtamasyz etilmegen nysandardy 2035 jylǵa deıin salýǵa jol berilmeıdi.
Sheshim 2026 jylǵy 6 qyrkúıekten bastap qoldanysqa engiziledi.
Buǵan deıin Astananyń biryńǵaı sáýlettik kelbetin qalyptastyrý jáne qala qurylysy máselelerin úılestirý úshin Sáýlet-qala qurylysy keńesin qurý josparlanyp otyrǵanyn jazǵan edik.
