Astanada avtokólikterdi durys qoımaý qalanyń kommýnaldyq qyzmetteriniń jumysyna kedergi keltirýde
ASTANA. QazAqparat - Kúnniń kúrt buzylýyna baılanysty qalanyń shuǵyl áreket etý qyzmetteri kúsheıtilgen jumys rejimine kóshti. Atap aıtqanda, elordanyń TJ departamenti, Astana q. ІІD ÁPB qyzmetkerleri jáne «Astana Tazalyq» JShS mamandary qys kezinde halyqtyń qaýipsizdigin qamtamasyz etýge baǵyttalǵan sharalar keshenin júrgizýde.
Bul týraly jýrnalısterge búgin jedel qyzmetterdiń ókilderi qala ákimdiginde ótken arnaıy baspasóz máslıhatynda málim etti, dep habarlaıdy astana.kz.
«Qalanyń kommýnaldyq qyzmetteriniń qys maýsymyna daıyndyǵyn tekserý sheńberinde qarashanyń 16-synan 18-ine deıingi aralyqta elordada «Qys-2016» komandalyq-shtabtyq oqý-jattyǵýy ótedi, onyń barysynda qys ýaqytynda halyqty jáne aýmaqty tótenshe jaǵdaılardan qorǵaýdy uıymdastyrý tekseriledi. TJD aýa raıynyń buzylatyndyǵy nemese basqa tótenshe jaǵdaılar týraly eskertý úshin barlyq ádister men jańa tehnologııalardy paıdalanady», - dep málim etti Astana q. TJD basshysy Barat Duzaqbaev.
B. Duzaqbaev qar jınaý jumystaryn ótkizý kezinde Astananyń Ákimshilik polıtsııa basqarmasynyń jáne Jergilikti polıtsııa qyzmetiniń qyzmetkerleri kúsheıtilgen rejimde jumys isteýge kóshkenin atap kórsetti. Ákimshilik polıtsııa qyzmetkerleriniń málimetterine sáıkes, 1999 jyly elordada tirkelgen avtokólikterdiń sany 40 myńdy quraǵan, 2010 jyly 209 myńǵa jetken, al 2016 jyly - 343 myńdy eńsergen.
«Tranzıttik kólikterdi jáne elimizdiń basqa óńirlerinen kelgen avtokólikterdi eseptemegende, jyl saıyn Astanada 25-30 myń kólik quraly tirkeledi. Osyǵan baılanysty avtokólik quraldarynyń úlken aǵyny jáne avtokólikterdi durys qoımaý qalanyń kommýnaldyq qyzmetteriniń jumysyna kedergi keltiredi. Jol qozǵalysynyń barlyq qatysýshylaryn qar tazalaý jumystaryna kedergi keltirmeý maqsatynda kólik quraldaryn qaraýsyz qaldyrmaýǵa shaqyramyz», - dep atap kórsetti Astana q. ІІD ÁPB aıryqsha tapsyrmalar jónindegi aǵa ınspektory Altybaı Baqytjan.
Sonymen qatar, elorda ákimdigi qar jınaý boıynsha 16 baǵytty bekitti, qalaǵa kire beriste jáne qaladan shyǵa beriste kólik qozǵalysyn shekteýge baǵyttalǵan 6 blok-beket jumys isteıdi. Jalpy, sońǵy kúnderi Astanada kóktaıǵaqqa baılanysty 100-den asa jol-kólik oqıǵasy tirkelgen, qaza tapqandar men zardap shekkender joq.
Óz kezeginde, «Astana Tazalyq» JShS mamandary sońǵy úsh táýlik ishinde elordada qardyń bir aılyq mólsheri túskenin habarlady. Sońǵy bir táýliktiń ózinde 120 myń tekshe metr qar shyǵaryldy, 2285 jol jumyskeri jáne 1698 arnaıy tehnıka tartyldy. Qala kósheleri men jaıaý júrginshi joldaryn tıimdi tazalaý úshin ústimizdegi jyldyń 11 qazanynan bastap «Aısmelt» jańa reagenti qoldanýǵa engizildi.
