Astanada avtokóliktegi órttiń aldyn alýǵa baǵyttalǵan aktsııa ótýde
ASTANA. 25 jeltoqsan. QazAqparat - Elordalyq qutqarýshylar bir aı boıy avtokólikterdiń órtenýiniń aldyn alýǵa baǵyttalǵan aktsııa ótkizedi. Statıstıkalyq málimetterge sáıkes bıyl Astanada avtokólikterdegi órtterdiń sany artyp, 173 kólik órtengen. Bul týraly astana.kz saıtyna TJD baspasóz qyzmetinen habarlady.
Vedomstvonyń habarlaýynsha, avtokóliktiń órtenýiniń basty sebepteriniń qataryna qysqa tuıyqtalý, jylytý júıesiniń aýytqýy men otty abaısyz qoldaný jatady.
«Astana qalasy boıynsha statıstıkalyq málimetterge sáıkes, 2013 jyly avtokólikterdegi órtterdiń sany óskeni baıqalady. Osylaısha, jyl basynan beri Astana qalasynda 173 órt oryn alǵan. Materıaldyq zalaldyń kólemi 12 mln. teńgeden asqan»,- delingen TJD baspasóz qyzmetiniń habarlamasynda.
Osyǵan baılanysty, Astana qalasy TJD Saryarqa aýdandyq TJB men Astana qalasy ÁPB birlesip avtokólikterdegi órttiń aldyn alýǵa baǵyttalǵan birqatar úgit-nasıhat is-sharalaryn júrgizýdi qolǵa aldy. Atap aıtqanda, Basqarmalardyń ókilderi men «Jas Otan» jastar qanatynyń músheleri kólikterdegi órttiń aldyn alýǵa baǵyttalǵan úgit-nasıhat paraqshalaryn taratty.
Sonymen qatar, avtokólik ıeleri kóp jınalatyn ǵımarattarda (mamandandyrylǵan avtokólik HQKO, kólik quraldaryn tirkeýge qoıý oryndarynda) arnaıy plakattar ilingen. Osy oryndarda órttiń aldyn alýǵa baǵyttalǵan beınematerıaldar kórsetiledi. Avtokólikterdegi órtterdiń aldyn alýǵa baǵyttalǵan is-shara 12 jeltoqsanda bastalyp, ústimizdegi jyldyń sońyna deıin jalǵasady.
