Astanada avtokólik úıge soǵylyp, jolaýshy mert boldy
ASTANA. QazAqparat - Astanada jeńil avtomobıl úıge soǵylyp, saldarynan jolaýshynyń ómiri qıyldy, dep habarlaıdy «QazAqparat» HAA Astana ІІD baspasóz qyzmetiniń basshysy Sofıa Qylyshbekovaǵa silteme jasap.
Onyń aıtýynsha, jol apaty 26 qarashada, 01:00 shamasynda Babataıuly jáne Jańa qonys kósheleriniń qıylysynda bolǵan. QR Qylmystyq kodeksiniń 345-baby boıynsha sotqa deıingi tergep-tekserý júrip jatyr. Tıisti saraptamalar belgilengen.
«Aldyn ala málimetterge sáıkes, «Lada» markaly avtomashınanyń júrgizýshisi kólikti basqara almaı qalyp, sharbaqty buzyp ótken. Kólik úıge baryp soǵylǵan. Jol apatynyń saldarynan túrli jaraqattarmen 29 jastaǵy júrgizýshi jáne 27 jastaǵy jolaýshy aýrýhanaǵa jetkizildi. 12:00 shamasynda aýyr jaraqat alǵan jolaýshy jan tásilim etti», - dep habarlaıdy Sofıa Qylyshbekova.
Avtomobıl kommýnaldyq turaqqa qoıyldy.
