Astanada avtokólik tonaýshy ustaldy

NUR-SULTAN. QazAqparat – Elordadaǵy Saryarqa aýdandyq polıtsııa basqarmasynyń jedel ýákilderi kólik tonaýshyny ustady, dep habarlaıdy QazAqparat Nur-Sultan qalasy PD baspasóz qyzmetine silteme jasap.

Túngi ýaqytta Aqan seri kóshesindegi úılerdiń aýlasynda júrgen kúdikti kólikterdiń tutqalaryn tartyp, esigi ashyq qalǵan avtony izdegen. Beınebaqylaý kameralary er adamnyń «VAZ 2114» avtokóliginiń salonynda urlyq jasaǵanyn tirkegen. Ol avtokólikke ashyq qalǵan júk salǵyshy arqyly kirip, «Ksıomı» uıaly telefonyn urlap ketken.

Jedel-izdestirý is-sharalary barysynda Saryarqa aýdandyq PB jedel ýákilderi uryny ustady. Qoldy bolǵan telefon tárkilendi. Atalǵan fakti boıynsha buryn tonaý úshin sottalǵan kúdiktige qatysty QR QK 188-babynyń 3-bóligimen sotqa deıingi tergeý júrgizilip jatyr. Onyń elorda aýmaǵynda buryn jasalǵan osyǵan uqsas qylmystarǵa qatysy bar-joǵy anyqtalady.

Nur-Sultan qalasynyń Polıtsııa departamenti kólik quraldarynyń ıelerine ury-qarydan saqtaný amaldaryn qabyldaýǵa keńes beredi.