Astanada avtobýstyń órtenýine ne sebep boldy
ASTANA. QazAqparat - «Astana LRT» kompanııasy jolaýshylar avtobýsynan shyqqan órtke ne sebep bolǵanyn túsindirdi, dep habarlaıdy QazAqparat tilshisi.
«Órttiń shyǵýyna artqy sol jaq dóńgelektiń tejegish qalybynyń synalanyp qalýy sebep bolǵan. Ot shyqqan kezde avtobýs saǵatyna 11 shaqyrym jyldamdyqpen kele jatqan», - dep habarlady kompanııanyń baspasóz qyzmetinen.
«Astana LRT» kompanııasy sonymen qatar, tilsiz jaýdyń artqy sol jaq dóńgelekke, kýzov qaptamasyna, avtobýs salonynyń paneline zaqym keltirgenin habarlady.
«Tilsiz jaýdy oqıǵa ornyna jetken órt sóndirýshiler aýyzdyqtady. Qazirgi ýaqytta oqıǵa ornynda tehnıkalyq qyzmet brıgadasy jumys atqaryp jatyr. Tejegish júıesinen shyqqan olqylyq rettelýde. Aldaǵy ýaqytta kúrdeli jóndeýden ótkizý úshin atalmysh kólik quraly avtobýs parkine jetkiziletin bolady», - delingen kompanııanyń habarlamasynda.
Eske sala ketsek, buǵan deıin elordadaǵy Shákárim Qudaıberdiuly dańǵylynda №41 avtobýstan órt shyqqanyn habarlaǵan bolatynbyz.
«3 qańtar kúni órtke qarsy qyzmet pýltine Astanadaǵy Shákárim Qudaıberdiuly dańǵylynda №41 avtobýstyń órtengeni týraly aqparat kelip tústi. Naqtyraq aıtqanda, avtobýstyń artqy dóńgelegi órtengen. Órt shyqqany 12:36 kezinde anyqtalyp, saǵat 12:38-de sóndirildi. Zardap shekkender nemese jaraqat alǵandar joq. Qazirgi ýaqytta órttiń shyǵý sebebi anyqtalyp jatyr», - dep habarlaǵan edi QR ІІM Tótenshe jaǵdaılar komıtetinen.
