Astanada avtobýstyń 9 kólikpen soqtyǵysýynan úsh adam zardap shekti - ІІD
ASTANA. QazAqparat - Astanada jolaýshylar tasymaldaıtyn avtobýs pen 9 birdeı jeńil kóliktiń qatysýymen bolǵan jol apatynan úsh adam zardap shekti. Bul týraly Іshki ister departamentiniń baspasóz qyzmetinen málim etti, dep habarlaıdy QazAqparat.
Eske salaıyq, 23 tamyz kúni №1 avtobýs parkine tıesili №9 baǵdardyń Iveco markaly avtobýsy 20 km/saǵ jyldamdyqpen kele jatyp («Vialon Pro» GPS-baǵdarlamasynyń málimeti boıynsha) aldyńǵy kólikterge soǵylǵan bolatyn . Oqıǵa saldarynan 9 jeńil kólik bir-birimen túıisken.
ІІD-den málim etkendeı, avtobýs Ýálıhanov kóshesi jaǵynan Respýblıka dańǵylyna qaraı bet alyp kele jatqan, «№45 úıge qarama-qarsy jerde kedergi týyndaǵan jerde qozǵalysty baqylaý múmkindigin qamtamasyz etpeı jáne kólik quralyn tolyǵymen toqtatýǵa deıingi tıisti sharalardy qabyldamastan, alda turǵan 9 kólikpen soqtyǵysýǵa jol berdi», delingen taratylǵan habarlamada.
«Jol-kólik apaty saldarynan úsh júrgizýshi túrli dene jaraqattarymen aýrýhanaǵa jetkizildi. Eki júrgizýshi qajetti medıtsınalyq kómek kórsetilgennen keıin úılerine qaıtaryldy. «Folksvagen Polo» avtomashınasynyń júrgizýshisi aýrýhanaǵa jatqyzyldy. Qazirgi tańda tekseris júrip jatyr», - dep naqtylady ІІD-den.
Aıta keteıik, Astana LRT kompanııasy tańerteń jumysqa kirispes buryn avtobýs júrgizýshisi medıtsınalyq tekserýden, al kólik tehnıkalyq tekseristen ótkenin habarlaǵan bolatyn.
«Aldyn ala málimet boıynsha, tejegishtiń isten shyǵý nusqasy naqtylanbaıdy», - dep atap ótti kompanııadan.
Qazirgi tańda júrgizýshi jumystan shettetildi.
