Astanada avtobýsty uzaq kútý máselesi joıylmaq
ASTANA. QazAqparat – Bıyl elordaǵa jańa 400-ge jýyq avtobýs jetkizilmek. Bul týraly Astana qalasynyń kommýnıkatsııalar qyzmetindegi baspasóz máslıhatynda «№1 Avtobýs parki» AQ basqarma tóraǵasy Medet Shaqaev aıtty, dep habarlaıdy QazAqparat tilshisi.
«Bıyl №1 Avtobýs parki Youtong markaly jańa 320 avtobýs satyp alady. Onyń ishinde 18 metrlik elektr avtobýstary jáne dızel otynymen júretin avtobýstar bar. 2024 jyly taǵy 100 avtobýs satyp alýdy josparlap otyrmyz», - dedi M. Shaqaev.
Onyń aıtýynsha, №1 Avtobýs parki bıyl jolaýshylarǵa qyzmet kórsetý sapasyn jaqsartý boıynsha birqatar keshendi is-sharany qarastyrǵan.
«Qazirgi kezde satyp alynǵan 18 metrlik 20 elektr avtobýsy №10 baǵdaryna shyǵaryldy. Jolaýshylar aǵynyn eskere otyryp, buryn №10 marshrýtta bolǵan 18 metrlik avtobýstar №
7, 44, 61 (Jaǵalaý shaǵyn aýdany), №24 (Óndiris turǵyn alaby), №9, 29 (Internatsıonalnyı kenti) baǵdarlaryna jiberildi. Atap aıtqanda, jańa 320 avtobýs jetkizilse, barlyq baǵdar boıynsha qosymsha jolaýshylar kóligi qosylady. Bul jaǵdaıda avtobýstar qozǵalysynyń ýaqyt aralyǵy 10-20 mınýttan 8-10 mınýtqa deıin qysqartylmaq», - dedi kásiporyn basshysy.
Aıta keteıik, Astana qalasy ákimdigi №1 Avtobýs parkiniń 100 paıyz aktsıoneri sanalady. Bul park elordanyń búkil marshrýttyq jelisiniń shamamen 70 paıyzyn qamtıdy, ıaǵnı 38 qalalyq baǵdarǵa jáne qala mańyndaǵy (100%) 28 baǵdarǵa qyzmet kórsetip keledi.
Jalpy, qalada 6 avtobýs parki qyzmet kórsetip jatyr. Osy jeke tasymaldaýshylar taǵy 80 avtobýs satyp almaq.
Buǵan deıin qalaǵa 400-ge jýyq avtobýs jetispeıtini habarlanǵan edi.
