Astanada avtobýstarǵa arnalǵan jolaqtarǵa qatysty jol erejesin buzǵan júrgizýshilerge aıyppul salynady
ASTANA. QazAqparat - Buǵan deıin habarlaǵanymyzdaı, búginnen bastap Astana qalasynda qalalyq qoǵamdyq kóliktiń qozǵalysy úshin «BUS LINE» jeke bólingen jolaqtardyń birinshi kezeńi iske qosyldy. Ol Baýyrjan Momyshuly dańǵyly Abylaıhan dańǵylynan Saraıshyq kóshesine deıin jáne Bógenbaı batyr dańǵyly Ýálıhanov kóshesinen Saryarqa kóshesine deıingi aralyqty qamtıdy.
«Osyǵan oraı, júrgizýshilerdiń esterine jolda júrý erejelerin saqtamaǵany úshin ákimshilik jaýapkershilik júkteletinin eske salamyz», dep habarlaıdy Astana qalalyq ІІD-iniń baspasóz qyzmetinen. Sonymen, jol júrisinde basymdyqty paıdalanatyn kólik quraldarynyń júrgizýshilerin qospaǵanda, jol júrisi qaǵıdalarynyń jaıaý júrginshilerge nemese jol júrisiniń ózge de qatysýshylaryna jol berý talaptaryn oryndamaý - 10 aılyq eseptik kórsetkish mólsherinde aıyppul salýǵa ákep soǵady (QR ÁQBtK 600-b. 1-t.). Osy baptyń birinshi bóliginde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan áreket boıynsha 20 aılyq eseptik kórsetkish mólsherinde aıyppul salynady (QR ÁQBtK 600-b. 2-t.). Sondaı-aq jol belgilerimen nemese joldyń júrý bóligindegi tańbalarmen kórsetilgen talaptardy saqtamaý 5 aılyq eseptik kórsetkish mólsherinde aıyppul salýǵa ákep soǵady (QR ÁQBtK 601-b. 1-t.). Osy baptyń birinshi bóliginde kózdelgen, ákimshilik jaza qoldanylǵannan keıin bir jyl ishinde qaıtalap jasalǵan áreket - 10 aılyq eseptik kórsetkish mólsherinde aıyppul salýǵa dáıek bolady (QR ÁQBtK 601-b. 2-t.). Al aqparattyq-nusqaý belgileri mynadaı: - «Marshrýttyq kólik quraldaryna arnalǵan jolaq». Kólik quraldarynyń jalpy legimen jol-jónekeı júretin marshrýttyq kólik quraldarynyń júrýine ǵana arnalǵan jolaq. Belgi ol ornatylǵan jolaqqa qoldanylady. Joldyń oń jaǵyna ornatylǵan belgi oń jolaqqa qoldanylady. - «Marshrýttyq kólik quraldary úshin jolaǵy bar jol». Marshrýttyq kólik quraldarynyń júrisi kólik quraldarynyń jalpy legine qarsy arnaıy bólingen jolaqta júzege asyrylatyn jol. - «Marshrýttyq kólik quraldary úshin jolaǵy bar jolǵa shyǵý». - «Marshrýttyq kólik quraldary úshin jolaǵy bar joldyń aıaqtalýy».
