Astanada avtobýstardy qas-qaǵymda tazartatyn avtojýý keshenderi ashylady
ASTANA. QazAqparat - Qoǵamdyq kólikterdiń sanıtarlyq jaǵdaıyn jaqsartý maqsatynda Astanada avtobýstardy 3 mınýt ishinde tazalaýǵa múmkindik beretin modýldik avtojýý keshenderi engizilmek.
Bul týraly «QazAqparat» agenttiginiń resmı saýalyna bergen jaýabynda Astana qalasy ákimdiginiń baspasóz qyzmeti málim etti.
Aıta keteıik, avtobýstardyń sanıtarlyq jaǵdaıyna turǵyndardyń shaǵymy az túspeıdi.
Ákimdiktiń habarlaýynsha, barlyq qalalyq qoǵamdyq avtobýstar kúndelikti ishki jáne syrtqy tazalaýdan ótedi.
«Osyǵan baılanysty, turǵyndardan túsetin barlyq shaǵymdar men aryzdardy, sonyń ishinde sanıtarlyq jaǵdaıǵa baılanysty habarlanǵan málimdemelerdi, mindetti túrde qarastyramyz. Sonymen qosa, kólik ishinde ańdaýsyz lastaný kóp jaǵdaıda Astana qalasynyń aýa raıyna jáne kóshelerde jol ınfraqurylymynyń bolmaýyna baılanysty týatynyn eskertemiz. Mundaı jaǵdaıda avtobýs júrgizýshileri, jol júrý kestesine saı, qosymsha tazalaý jumystaryn ótkizý úshin, avtoparkterge soǵýǵa tyrysady», - dep atap ótedi qala basshylyǵy.
«Osy suraqtardy sheshý maqsatynda, biz bólek turǵan modýldik avtojýý keshenin engizýdi qarastyryp otyrmyz. Bul avtobýstardy 3 mınýt ishinde tazalaýǵa múmkindik beredi», - delingen habarlamada.
Sonymen qatar búgingi tańda qalada Kólikti baqylaý qyzmeti qurylǵan. Ol avtobýstardaǵy jol júrý tólemderin, jolaýshylardy tasymaldaıtyn operatorlardyń jumysy men avtobýstardyń tehnıkalyq jáne sanıtarlyq jaǵdaıyn baqylaıdy.
