Astanada avtobýsqa tek aldyńǵy esikten kirýdi mindetteıtin ereje kúshin joıdy
2024 jyldyń 1 aqpanynan bastap elorda turǵyndary men qonaqtary qoǵamdyq kólikke naqty esikti tańdamaı kirýge jáne shyǵýǵa quqyly. QR Úkimetiniń 2007 jylǵy 8 qarashadaǵy qaýlysymen bekitilgen elordada jolaýshylar men bagajdy tasymaldaý Erejesiniń kúshi joıyldy, dep habarlaıdy «City Transportation Systems» JShS baspasóz qyzmeti.
Jolaýshylardy tasymaldaýdyń jańa erejesine sáıkes jolaýshylardyń otyrǵyzý men túsirý barlyq esik arqyly júzege asyrylady. Qazirgi ýaqytta baǵdarlardaǵy aýdıo habarlamalar men beınerolıkterdi óshirý jumystary júrip jatyr.
Esterińizge sala keteıik, qoǵamdyq kólikte jol aqysyn tóleý jáne valıdatsııa jasaý jolaýshynyń mindeti. «Ákimshilik quqyq buzýshylyq týraly» Qazaqstan Respýblıkasy kodeksiniń 622-babynyń 2-bóligine sáıkes tólemnen jaltarǵany úshin 2 aılyq eseptik kórsetkish mólsherinde aıyppul kózdelgen. Búgingi tańda aıyppul kólemi – 7 384 teńge.
Sondaı-aq, 2023 jyldyń qazan aıynan bastap elorda turǵyndary men qonaqtaryna yńǵaıly bolý úshin ınnovatsııalyq sheshimder kezeń-kezeńimen engizilýde. Kólik kartasy jáne QR-kod arqyly tóleýden basqa, «Avtobys» mobıldi qosymshasymen Bluetooth arnasy arqyly jol júrý aqysyn tóleýge de bolady. Bluetooth arqyly tóleý smartfonnyń «Avtobys» qosymshasy arqyly baılanyssyz qosylýyn kózdeıdi. Bul ádis ásirese avtobýsta jolaýshylar kóp bolǵan kezde yńǵaıly tólem tásili. Qoǵamdyq kóliktiń jyljymaly quramnyń negizgi bóligi (1 242 birlik) «Avtobys» júıesine qosylǵan.
Qalanyń qoǵamdyq kólik jolaýshylaryna óz baǵytyn josparlaý, jol aqysyn tóleý jáne túrli tólemder jasaý úshin qoldanylatyn «Avtobys» mobıldi qosymshasyn AppStore, App gallery jáne Google Play-den júkteýge bolady.
Qazirgi ýaqytta balanstyń eski júıeden jańasyna kóshýi júrip jatyr. Osyǵan baılanysty jańa planshetterde kólik kartalaryn taný boıynsha máseleler týyndaýy múmkin. Olar 2024 jyldyń birinshi toqsanynyń sońyna deıin sheshiledi.
