Astanada avtobýs júrgizýshileri tabysyn arttyrý úshin qosymsha jumysqa kelisedi — Eńbek ınspektsııasy

ASTANA. KAZINFORM — Astana qalasynyń eńbek ınspektsııasy elordada bolǵan avtobýs apaty boıynsha tekserý jumystaryn júrgizip jatyr. Bul týraly Eńbek jáne halyqty áleýmettik qoldaý mınıstrligi Memlekettik eńbek ınspektsııasy komıtetiniń tóraǵasy Erbolat Ábilhatın aıtty. 

Spıkerdiń aıtýynsha, qoǵamdyq kólikte adam tasý — qaýipti eńbek jaǵdaıyndaǵy jumys bolyp sanalady jáne júrgizýshilerdiń tapshylyǵy máselesi de bar.

— Barlyq avtobýs parki Astana qalasynyń eńbek ınspektsııasynyń monıtorınginde tur. Sońǵy jyldary avtobýs parkinde jalaqy berý boıynsha eńbek daýy jáne jumys isteý ýaqyty boıynsha shaǵymdar bolǵan. Árbir shaǵym boıynsha eńbek ınspektsııasy tekserý júrgizedi, sońǵy jol apaty boıynsha da tekserý júrip jatyr. Árıne osyny boldyrmaý úshin aýysymdy jumys rejımi engizilgen (8 saǵattyq). Biraq, deı turǵanmen, júrgizýshiler qosymsha tabys tabý úshin nemese óz tabysyn arttyrý úshin sondaı rejımde qosymsha jumys isteýge ózderi kelisedi. Ondaı da oqıǵalar bar, − dedi Erbolat Ábilhatın Úkimet úıinde ótken baspasóz máslıhatynda.

Buǵan deıin habarlaǵanymyzdaı, 2 maýsymda Astanada avtobýs júrgizýshisi rólge ıe bola almaı, jol jıegindegi baǵanǵa soǵyldy.

Jedel medıtsınalyq járdem brıgadalary qala statsıonarlaryna barlyǵy 15 adamdy jetkizdi. Olardyń úsheýi aýrýhanaǵa jatqyzyldy. Jol apaty kezinde zardap shekken 8 jasar qyzdyń aıaǵyna ampýtatsııa jasaldy.