Astanada avtobýs júrgizýshisi jol suraǵan jolaýshyǵa temir ala júgirdi

Bul oqıǵaǵa sol avtobýstyń ishinde otyrǵan QazAqparat agenttiginiń jýrnalısi Kúnsultan Otarbaı kýá bolyp, jańjaldy qalta telefonyna túsirip alǵan.

Keleńsiz jaǵdaı Baraev kóshesi, Baraev aıaldamasynda oryn aldy. Avtobýstyń aldyńǵy esiginen úńilip jol suraǵan adamǵa júrgizýshi ne sebepten ekeni belgisiz, oryndyǵynyń astynan kespeltek temir ala júgirgen. Jolaýshy úshkir zattan seskenip, keıin qaraı qashqanymen ashýǵa býlyqqan jas júrgizýshi álginiń jaǵasynan ala túsedi. Sol sátte jábirlenýshiniń qasynda turǵan bir áıel arasha túspek bolyp, júrgizýshiniń qolyndaǵy temirge jarmasady.

Al aıaldamada turǵan ózge jurttar tosynnan oryn alǵan oqıǵanyń neden bastalǵanyn, naqty kimniń kináli ekenin túsinbeı, ańtarylyp qalsa kerek. Jańjaldasqandarǵa arasha túsken áıel júrgizýshiniń kesirinen jerge qulap túskende ǵana baryp, ózgeler kómekke umtylady.

Al ana áıel jerge qulasa da, júrgizýshiniń qolyndaǵy temirden aıyrylǵan joq. Biraq óziniń qatty soqqy alǵany beınejazbadan anyq kórinip tur.

Al júrgizýshi bolsa, ony turǵyzyp, keshirim suramaq túgili, qolyna ustap alyp túsken temirine de qaramastan avtobýsyna otyryp, kete barady.

Halyqtyń amandyǵyn basty nazarda ustaýy tıis qoǵamdyq kólik júrgizýshileriniń arasynda osyndaı da soraqylyqqa jol beretin jandardyń bar ekendigi ókinishti-aq.