Astanada avtobýs júrgizýshisi qansha jalaqy alady
ASTANA. QazAqparat - Elordadaǵy qoǵamdyq avtobýs júrgizýshileriniń ortasha jalaqysy belgili boldy. Ony búgin Astana ákimdiginde ótken baspasóz máslıhatynda «Astana LRT» kóliktik baqylaý departamentiniń basshysy Saıat Shaımerdenov jarııa etti, dep habarlaıdy QazAqparat tilshisi.
«Orta eseppen alǵanda, barlyq avtopark pen tasymaldaýshylardaǵy jalaqy 250 myń teńge tóńireginde. Bireýler konsýltantsyz jumys isteıdi, olarǵa ústemeaqy bar, bireýler valıdatsııa josparyn artyq oryndasa, oǵan qosymsha bonýs beriledi. Endi bireýi ekinshisiniń ornyn aýystyryp, kóbirek jumys isteýi múmkin. Sonda tómengi jalaqy 200 myń teńgeden bastalyp, 400 myń teńgege deıin jetedi», - dedi ol.
Al óz kezeginde «Astana LRT» basshysy Bekmyrza Igenberdınov uıymda qoldanylatyn júrgizýshilerdi yntalandyrý júıesi jaıynda aıtyp berdi.
«Tipti avtoparkterde mynadaı júıe de bar. Júrgizýshiler batyr, sýperbatyr, qurmet taqtasy dep bólinedi. Eshqandaı shaǵymy joq, jol-kólik oqıǵasyna ilikpegen, barlyq sharttar men talaptardy oryndaıtyn,óz jumysyn jaqsy kóretin júrgizýshiler sýperbatyr sanatyna iligedi. Árıne, olardyń jalaqysy da jaqsy», - dedi ol.
Osy oraıda B.Igenberdınov elordada kásibı biliktiligi joǵary avtobýs júrgizýshileriniń jetispeıtinin ashyq aıtty.
«Júrgizýshi tapshylyǵy bar, ol ásirese qoǵamdyq kólikte aıryqsha baıqalady. Júrgizýshilerimizdi aqtaǵanym emes, biraq, ózim de kólik júrgizetin bolǵan soń olardy túsinemin. Tań atqannan kesh batqanǵa deıin bir baǵdarda júredi. Jumys barynsha aýyr, kúni boıy túrli kóńil-kúıdegi, árqıly energetıkasy bar myńdaǵan adammen kezdesedi. Jol kesip, avtobýs jolaǵyna shyǵyp ketetinder de bar. Júrgizýshi avtobýstyń syrtyndaǵy ahýaldy da, ishindegi ahýaldy da jol boıy udaıy baqylap otyrýy kerek», - dedi B.Igenberdınov.
