Astanada avtobýs júrgizýshileriniń «qara tizimi» jarty aıda úsh ese uzarǵan
ASTANA. QazAqparat - Astanada jarty aıdyń ishinde avtobýs júrgizýshileriniń «qara tizimine» engenderdiń sany 441-ke jetken. Bul týraly qala ákimdiginde ótken baspasóz máslıhatynda Astana LRT JShS Basqarma tóraǵasynyń orynbasary Beıbit Esjanov málim etti, dep habarlaıdy QazAqparat tilshisi.
«Ákimdik tasymaldaýshylardyń saparyn sýbsıdııalaıdy. Sondyqtan, qazan aıynan bastap Astana LRT operatorlarmen jáne tasymaldaýshylarmen aıyppul sanktsııalary boıynsha kelisimge keldi. Biz qazirgi tańda barlyq buzýshylyqtar boıynsha jumys júrgizip, tıisti aıyppuldardy salyp jatyrmyz», - deıdi spıker.
Onyń aıtýynsha, qazan aıynyń ózinde tasymaldaýshylarǵa 22 mln teńgeniń aıyppuly salynǵan.
«Búgingi tańda 441 júrgizýshi qara tizimge engizildi. Osy sharalardyń arqasynda olar tártipke baǵynyp keledi. Biraq, barlyq júrgizýshilerdiń tártibin retke keltirý úshin bizge qosymsha ýaqyt kerek», - deıdi Beıbit Esjanov.
Aıta ketsek, 19 qazandaǵy jaǵdaı boıynsha «qara tizimde» tek 132 júrgizýshi bolǵan edi. Bar bolǵany jarty aıdyń ishinde qara tizimge engenderdiń sany 441-ge jetken.
Eske sala ketsek, budan buryn Beıbit Esjanov elektrondy tólem júıesine qatysty aptasyna 100-ge tarta shaǵym túsetinin habarlaǵan edi. Onyń aıtýynsha, áleýmettik jeli paraqshalaryndaǵy sońǵy vıdeorolıkterdi taldaı otyryp, keńesshilerdiń (kondýktorlar) nemese júrgizýshilerdiń bıletti bermeı qoıatyny, al jolaýshylardyń keı jaǵdaıda tólemnen jaltaratyny anyqtalǵan.
