Astanada avtobýs júrgizýshileri úsh kúnde 280 ret jol erejesin buzǵan
ASTANA. QazAqparat - Astanada «Avtobýs» jedel-profılaktıkalyq is-sharalar ótkizilgen úsh kúnniń ishinde avtobýs júrgizýshileri 280 ret jolda júrý erejesin buzǵan, dep habarlady elordalyq ІІD baspasóz qyzmeti.
Astana qalalyq ІІD ákimshilik polıtsııa basqarmasynyń habarlaýynsha, jedel-profılaktıkalyq is-sharalar kezinde qoǵamdyq kólik júrgizýshileriniń 280-nen astam jol júrý erejelerin buzǵandyǵy anyqtaldy. Anyqtalǵan ereje buzý faktileri boıynsha avtobýs júrgizýshileri ákimshilik jaýapqa tartyldy.
«Sondaı-aq, jelige tehnıkalyq aqaýy bar avtobýstardy shyǵarý faktileri anyqtaldy. 6 laýazymdyq jáne zańdy tulǵaǵa (avtobýs parkteri) qatysty ákimshilik jazaǵa tartý týraly ákimshilik óndiris qozǵaldy», - delingen habarlamada.
