Astanada avtobýs jumysyn baqylaıtyn qyzmetkerler kóbeıtiledi
ASTANA. QazAqparat - Astana ákimdigi qala ishindegi qoǵamdyq kólikterge qatysty kemshilikterdi qalaı retteıdi. Qalalyq Kólik jáne jol ınfraqurylymyn damytý basqarmasynyń basshysy Álıhan Qýatbekov ákimdikte ótken baspasóz máslıhatynda osy týraly aıtyp berdi, dep habarlaıdy QazAqparat tilshisi.
«Saralanǵan tarıf engizilgeli beri kólik kartalaryn paıdalanýda biraz kúrdeli máseleler oryn aldy. Ony jasyrmaımyz. Qoǵamdyq kólikte júretin astanalyqtardyń 93 paıyzy osy kólik kartalaryna aýysty. Soǵan qaramastan, áli de kartalardyń toltyrylýyndaǵy olqylyqtardy joıý máselelerin alǵa qoıyp otyrmyz. Sonymen birge, avtobýstardyń ıntervaldardy saqtamaý jaǵy áli de bolyp jatyr. Osynyń saldarynan ásirese keshki ýaqytta avtobýsty jolaýshylar kóp kútip qalady. Muny sheshýdiń joly bar. Qazir biz «Astana LRT» kompanııasyna tapsyrma berip, baqylaýshylardy kóbeıtý júıesin qolǵa alyp otyrmyz. Az ýaqytta ol jumys nátıjesin beredi dep esepteımiz», - deıdi ol.
Álıhan Qýatbekov baspasóz máslıhaty barysynda baqylaýshylar tek tólemniń júrgizilgenin tekserýmen shektelmeıtinin atap ótti.
«Ol baqylaýshylar tek aqshanyń tólený máselesin ǵana emes, avtobýstardyń sanıtarlyq jaǵdaıyn, júrgizýshilerdiń óz jolynda qalaı ustaýyn, avtoınformator, ıaǵnı aıaldamalardy ýaqtyly habarlaý máselelerin tekseredi. Osy máselelerdiń bári de jaqyn arada sheshýge bolatyn sharýalar dep esepteımiz», - deıdi ol.
