Astanada avtobýs pen krannyń soqtyǵysýynan zardap shekken bir adam áli jansaqtaý bóliminde
ASTANA. QazAqparat - Astana-Qosshy tasjolynda avtobýs pen krannyń soqtyǵysýynan zardap shekken 5 adamnyń tórteýi jalpy palataǵa aýystyryldy, bir adam áli kúnge deıin jansaqtaý bóliminde jatyr, dep habarlady búgin «Respýblıkalyq jedel medıtsınalyq járdem ǵylymı ortalyǵy» aktsıonerlik qoǵamynyń bólim basshysy Rýslan Botaev «QazAqparat» tilshisine bergen suhbatynda.
«Bes adam jansaqtaý bólimine túsken bolatyn, olardyń tórteýi jalpy palataǵa aýystyryldy. Qazirgi ýaqytta jasy úlken bir áıel adamnyń hali aýyr. Oǵan keshe ota jasaldy. Búgin onyń jaǵdaıy turaqty dep baǵalanýda. Tynys alý joldaryna jáne júrek qaǵysyna monıtorıng jasalyp jatyr», - dedi ol.
Eske sala keteıik, atalmysh jol-kólik oqıǵasy 17 naýryzda Astana-Qosshy tas jolynda tańerteńgi saǵat 8.17 shamasynda oryn aldy. «KamAZ» bazasyna ornatylǵan kran solǵa qaraı burylar kezde qarsy kele jatqan 43-shi marshrýttaǵy Qosshy-Astana avtobýsyn ótkizbegen. Osynyń saldarynan qaqtyǵys oryn aldy.
«KamAZ» júrgizýshisi avtokóligin basqara almaı, taǵy úshinshi mashınamen soqtyǵysty. JKO nátıjesinde tórt kólik qaqtyǵysyp, 16 adam zardap shekti.
