Astanada avtobýs 22 jastaǵy boıjetkendi qaǵyp ketip, mert qyldy

ASTANA. KAZINFORM – Astanada avtobýs júrgizýshisi 22 jastaǵy boıjetken qyzdy qaǵyp ketti. Japa shegýshi alǵan jaraqatynan mert bolǵan. Bul týraly Astana qalasy Polıtsııa departamentiniń baspasóz qyzmeti habarlady.

«Juban Moldaǵalıev kóshesinde marshrýttyq avtobýstyń júrgizýshisi belgilenbegen jerden ótip bara jatqan jaıaý júrginshini qaǵyp ketti. Alǵan jaraqattarynyń saldarynan jaıaý júrginshi kóz jumdy. Atalǵan fakti boıynsha qylmystyq is qozǵaldy. Tekserý júrgizilýde. Qylmystyq is sheńberinde biz kólik basqarmasyna jol-kólik oqıǵalarynyń týyndaýyna nemese jasalýyna yqpal etetin mán-jaılardy joıý týraly usynym jiberetin bolamyz», - dep málimdedi Astana qalasy Polıtsııa departamenti Anyqtaý basqarmasy bastyǵynyń orynbasary, polıtsııa podpolkovnıgi Áset Súleımenov.

Mert bolǵan qyzdyń esimi - Kan Lolıta Evgenevna. Týystarynyń aıtýynsha, bul qaıǵyly oqıǵanyń bolýyna birneshe jaǵdaı sebep bolǵan.

«Oqıǵa bolǵan jerde jaıaý júrginshige arnalǵan jol joq, joldyń jıegi qazylyp tastalǵan. Odan bólek, kóshe jaryqtandyrylmaǵan. Bul oqıǵaǵa qalalyq ákimdik te, sol turǵyn úıdi salǵan qurylys kompanııasy da jaýap berýi tıis dep sanaımyz. Sebebi Jubanov kóshesiniń sol aýmaqtaǵy bóliginde avtobýs aıaldamasy da joq. Lolıta sán salonynan shyǵyp, bir oram (kvartal) jerdegi aıaldamaǵa bet alǵan. Jolda osyndaı qaıǵyly jaǵdaıǵa tap boldy», - dep málimdedi qaza bolǵan qyzdyń jezdesi Abbas Appazov.

Oqıǵa 26 qazan kúni keshki saǵat 21:40 shamasynda bolǵan. Qyzdyń denesi búgin jer qoınyna tabystaldy.

Aıta keteıik, buǵan deıin keıingi 9 aıda elordada jol apaty eki ese ulǵaıǵany týraly jazǵan edik.