Astanada aýyzsýdan A gepatıtiniń taıaqshalary tabylǵandyǵy týraly aqparat jalǵan bolyp shyqty
ASTANA. QazAqparat - Astanada Whats App arqyly taralǵan jalǵan aqparat elorda turǵyndarynyń záresin ushyrdy, dep habarlaıdy QazAqparat.
«Sýdy ázirge qaınatylǵannan keıin ishińizder, sý tasqyny saldarynan sýdan A gepatıtiniń taıaqshalary men dızenterııa tabylǵan. Jemisterdi de, tisti de qaınatylǵan sýmen jýyńyzdar. Aqparat shyndyqqa janasady. Búgin sanepıdstansadan epıdorta týraly anyqtama qaǵazyn aldyq, ol jerde barlyǵy rastaldy!!!», - delingen atalmysh aqparatta.
Astana qalasy turǵyn úı-kommýnaldyq sharýashylyǵy basqarmasy men «Astana Sý Arnasy» bul aqparatty resmı túrde joqqa shyǵardy jáne qala turǵyndarynan alańdamaýdy suraıdy. Aqparat jalǵan bolyp tabylady.
«Qubyrdaǵy sýdyń sapasy «Astana sý arnasy» men «Astana qalasy Qoǵamdyq densaýlyq saqtaý departamentiniń» vedomstvolyq zerthanasynyń jiti baqylaýynda. Astananyń sý sorǵysh-súzgish stansasynda jumys toqtaǵan emes: sý hlorlanyp, koagýlıatsııalanady, tundyrylyp, súzgiden ótedi, sosyn taǵy hlorlanady. Qubyrdaǵy aýyzsýdyń sapasy barlyq kezeńderde tekserilip otyrady. Aýyzsýǵa qoıylatyn negizgi talaptar, onyń epıdemıologııalyq turǵydaǵy qaýipsizdigi, toksıkologııalyq turǵyda zııansyzdyǵy, organoleptıkalyq turǵydaǵy oń kórsetkishteri men sharýashylyq qajettilikterge jaramdylyǵy bolyp tabylady. Taldaý júrgizilgennen keıin, aýyzsý sapasynyń barlyq parametrleri GOST talaptaryna jáne sanıtarlyq erejelerge saı keledi», - delingen «Astana Sý Arnasy» taratqan habarlamada.
Óz kezeginde Astana qalasy Qoǵamdyq densaýlyq saqtaý departamentiniń mamandary elordada aýyr ishek aýrýlary men A gepatıti boıynsha epıdemıologııalyq ahýal turaqty ekendigin aıtýda. Olardyń sýmen qamtamasyz etý júıelerimen baılanysy joq.
Mamyr aıynda sýdyń 152 synamasy alynǵan. Onyń barlyǵynan talapqa saı emes sý synamasy tabylmaǵan.
