Astanada aýyr jaraqat alǵan bes jasar qyzdyń jaǵdaıyna baılanysty týysy pikir bildirdi
ASTANA. QazAqparat - Elordada aýyr jaraqatqa baılanysty aýrýhanada em qabyldaǵan bes jasar qyzdy Almatyda turatyn anasynyń ápkesi alyp ketti, dep habarlaıdy QazAqparat.
«Bala bizben birge Almatyda turady. Bizdegi jaǵdaı jaqsy jáne búldirshindi barlyq qajettiliktermen qamtamasyz ete alamyz. Balalarymyz eseıip ketken, sondyqtan balanyń jaǵdaıyn tolyqtaı jasaýǵa qaýqarlymyz», - dedi balanyń Aqmaral esimdi týysqany.
Belgili bolǵandaı, bes jasar qyzdyń anasy men naǵashysy Aqmaraldyń jaqyn týystary. Osy oraıda ol qyzdyń naǵashysy balany soqqyǵa jyqty degen qaýesetke senbeıtinin atap ótti.
«Onyń (qyzdyń naǵashysy) otbasynda qandaı da bir qıyndyqtar bolǵan emes. Sonymen qatar bul oqıǵaǵa baılanysty naqty eshteńe aıta almaımyn. Alaıda inim osyndaı qatygezdikke barmaıtynyn senimmen aıta alamyn. Sebebi ony ózim tárbılep ósirgenmin, ıaǵnı kishkentaıynan jaqsy bilemin. Sondyqtan ol ondaıǵa barmaıdy», - dedi Aqmaral.
Osy oraıda Aqmaral atalǵan oqıǵany talqylaý kezinde týysqan inisine qatysty aıyptaýlar múldem orynsyz ekenin atap ótti.
«Bastapqyda bolǵan jaıtty týystardan bildim. Balanyń anasyna qatysty tıisti jaǵdaı týyndaǵandyqtan, alǵashynda búldirshindi ózimizdiń tárbıemizge alǵymyz kelgen edi. Balanyń anasyna qatysty tergeý júrip jatty jáne ony bosatady degen úmit boldy. Sondyqtan biz sońyna deıin kúttik. Keıin osy jaǵymsyz jaǵdaı boldy», - dep qosty ol.
Aıta keteıik, Astanada denedegi soqqy izderinen keıin em qabyldaǵan bes jasar qyz búgin aýrýhanadan shyqty.
Mamandardyń tekserýi kezinde balanyń bas mıynda ótkir sýbdýraldyq qandy isiktiń bary anyqtaldy. Budan keıin bala neırohırýrgııa bólimshesine aýystyrylyp, oǵan ota jasaldy.
Esterińizde bolsa, 3 naýryzda Qýat Ahmetjanov Qazaqstandaǵy Bala quqyqtary jóninde ýákildiń Feısbýktegi paraqshasynda WhattsApp messendjerinen kelgen kishkentaı qyz týraly habarlama men onyń fotosýretin jarııalady. Ol denedegi soqqy izderimen qalalyq №2 balalar aýrýhanasyna túsken.
Qazaqstan Respýblıkasyndaǵy Bala quqyqtary jónindegi ýákil, Parlament depýtaty Zaǵıpa Balıeva bes jasar qyzdyń taǵdyryn óz baqylaýyna aldy. Sonymen qatar ol balanyń dıvannan qulap, osyndaı jaraqat alǵandyǵy týraly sebepke kúmánmen qaraıtynyn aıtqan bolatyn.
