Astanada aýyr jaraqat alǵan bes jasar qyz dárigerlerdiń baqylaýynda bolady
ASTANA. QazAqparat - Astanada denedegi soqqy izderinen keıin em qabyldaǵan bes jasar qyz aýrýhanadan shyqty, dep habarlaıdy QazAqparat.
Búldirshindi alyp ketýge tutas delegatsııa keldi. Olardyń arasynda anasynyń ápkesi, psıholog, Bala quqyqtary jónindegi ýákildiń ókilderi, sondaı-aq Іshki ister departamentiniń qyzmetkerleri de bar.
«Balanyń jaǵdaıy qanaǵattanarlyq deńgeıde, endi ony aýrýhanadan shyǵarýdy josparlap otyrmyz. Qazirgi kezde balany qamqorshysyna, ıaǵnı anasynyń ápkesine tapsyryp jatyrmyz», - dedi №2 balalar aýrýhanasyndaǵy neırohırýrgııa bóliminiń meńgerýshisi Erbol Qozbaǵarov.
Onyń sózine qaraǵanda, 3 aıdan keıin bala ońaltý kýrstarynan ótýi tıis.
«Budan keıin bala árbir 6 aı saıyn nevropatologtyń baqylaýynda bolýy kerek. Atap aıtqanda, bastan aýyr jaraqat alǵan barlyq naýqastar nevropatologtyń tirkeýinde bolady. Bul rette saýyqtyrý men emdeýdiń uzaq merzimdi kýrstary júrgiziledi», - dep tolyqtyrdy dáriger.
Aıta ketsek, atalǵan jáıt áleýmettik jelilerde qyzý talqylanyp, qoǵamdyq rezonans týdyrdy. Qoldanýshylar qyz balanyń taǵdyryna alańdaýshylyq bildirip, tipti keıbiri ony asyrap alýǵa daıyn ekendikterin jazýda.
Esterińizde bolsa, 3 naýryzda Qýat Ahmetjanov Qazaqstandaǵy Bala quqyqtary jóninde ýákildiń Feısbýktegi paraqshasynda WhattsApp messendjerinen kelgen kishkentaı qyz týraly habarlama men onyń fotosýretin jarııalady. Ol denedegi soqqy izderimen qalalyq №2 balalar aýrýhanasyna túsken.
Qazaqstan Respýblıkasyndaǵy Bala quqyqtary jónindegi ýákil, Parlament depýtaty Zaǵıpa Balıeva bes jasar qyzdyń taǵdyryn óz baqylaýyna aldy.
Sonymen qatar ol balanyń dıvannan qulap, osyndaı jaraqat alǵandyǵy týraly sebepke kúmánmen qaraıtynyn aıtqan bolatyn.
