Astanada aýyl jastary men oralmandardy áleýmettik beıimdeıtin qyzmet jumys isteı bastady

Bul týraly búgin ótken baspasóz máslıhatynda atalmysh jobany júzege asyrýshy Gúlden Raqymjanova málim etti, dep habarlaıdy QazAqparat.

G.Raqymjanovanyń atap ótkenindeı, «Aýyl jastary men oralmandardy áleýmettik beıimdeý qyzmetin qurý» jobasyn Astana qalasy ákimdigi Іshki saıasat basqarmasynyń memlekettik áleýmettik tapsyrysy aıasynda «Azamattyq bastamalardy damytý» qoǵamdyq birlestigi Astana qalasy aýyl jastarynyń odaǵymen jáne S.Seıfýllın atyndaǵy Qazaq agrotehnıkalyq ýnıversıtetimen birlesip júzege asyryp otyr.

Búginde Jeńis dańǵyly, 48 meken-jaıynda ornalasqan Ortalyqta aqysyz negizde orys tili men kompıýterlik saýattylyqqa úıretý sabaqtary ótkizilýde. «Aldaǵy ýaqytta psıhologııalyq trenıngter, zań máselelerine qatysty keńester men sheberlik sabaqtar ótkiziletin bolady. Sondaı-aq Ortalyqta senim telefony jumys isteıdi (7172 393809). Kýrs sońynda arnaıy sertıfıkattar beriletin bolady», - dep atap ótti ol.

Ústimizdegi jylǵy qyrkúıek aıynda júzege asyryla bastaǵan jobanyń alǵashqy ilki jobasy jeltoqsan aıynda aıaqtalady. Uıymdastyrýshylar qarjylyq máseleler sheshilgen jaǵdaıda onyń ekinshi kezeńin iske asyrýdy kózdep otyr. Sebebi, joba jastardyń atalmysh kontıngenti arasynda qyzyǵýshylyqqa barynsha ıe.

«Úlken qalaǵa kelgen jas qandaı da bolmasyn jáne kimnen bolmasyn kómekti qajet etedi. Sebebi, olar birinshiden, eki tildi (red. - orys jáne qazaq tilderin) birdeı jetik meńgermegen bolsa, ekinshiden, Astananyń qarqyndy tirshilik qozǵalysyna birden beıimdele almaıdy. Sondyqtan, jastardyń úlken ári bóten qala ómirine sińisip ketýi úshin bul jobanyń paıdasy zor», - dedi S.Seıfýllın atyndaǵy QazATÝ-dyń Tárbıe jumysy jáne áleýmettik máseleler jónindegi prorektory Aleksandr Maıer.

Aıta keteıik, S.Seıfýllın atyndaǵy QazATÝ-da barlyǵy 6 myń 500-den astam stýdent bilim alsa, onyń 3682-sin aýyl jastary quraıdy. Onyń ishinde ózge elderden kelgen 100-den astam qandasymyz bar.