Astanada aýtızmge shaldyqqan balalarǵa arnalǵan ortalyq ashyldy
ASTANA. QazAqparat - Elordada «Aýtızm». Álem barshaǵa ortaq» baǵdarlamasy aıasynda aýtızmge shaldyqqan balalarǵa arnalǵan «Asyl Mıras» ortalyǵy ashyldy. Bul - Qazaqstandaǵy osyndaı ekinshi ortalyq.
Osy dertke shaldyqqan balalar men olardyń otbasylaryna kómek kórsetetin birinshi ortalyq bıyl maýsym aıynda Almatyda ashylǵan bolatyn. Saltanatty sharaǵa QR Densaýlyq saqtaý jáne áleýmettik damý mınıstriniń birinshi orynbasary Salıdat Qaıyrbekova, Astana qalasy ákiminiń orynbasary Ermek Amanshaev jáne qoǵam qaıratkerleri, kásipkerler jáne BAQ ókilderi qatysty, dep habarlaıdy elorda ákimdiginen.
Astana qalasy ákiminiń orynbasary Ermek Amanshaev: «Birinshi kezekte «Asyl mıras» qoryna úlken alǵysymyzdy bildirgimiz keledi. Bul tek astalyqtar úshin ǵana emes, balalar men ata-analar úshin de óte mańyzdy másele. Búgin Astanada ekinshi ortalyq ashylyp jatyr. Qordyń kelesi ortalyǵy, meniń bilýimshe, Óskemen jáne Qyzylorda qalalarynda ashylady. Balalardyń ómirge oralýy, óziniń qatarlastarmen birge tirshilikke ilesip ketýi - bul mańyzdy rýhanı oqıǵa», - dedi.
Búginde Astanada 200-ge jýyq bala aýtızm aýrýyna shaldyqqan, Qazaqstan boıynsha 1,5 jýyq bala esepte tur.
«Aýtızm». Álem barshaǵa ortaq» baǵdarlamasynyń negizgi maqsaty aýtızmge shaldyqqan balalardy erte anyqtaý, ońaltý, ınklıýzıvti bilim berý jáne áleýmettik ıntegratsııa jolymen - dıagnoz qoıylǵannan bastap qoǵamdaǵy jeke ómirine deıin qalyptastyrý bolyp tabylady.
Ońaltý kýrsy 6 aıǵa sozylady. Bir jyldyń ishinde 180 balaǵa keshendi kómek kórsetiledi. Ortalyq aýtızmdi korrektsııalaýdyń eki ádistemesine negizdelgen biryńǵaı korrektsııalyq baǵdarlama boıynsha jumys isteıdi. Birinshisi - balamen birge onyń áleýmettik-kommýnıkatıvtik jáne tanymdyq, sóıleý sferasymen jáne kúndelikti ómirdegi qajetti daǵdylarymen jumys isteýdi kózdeıtin klassıkalyq ádisteme.
Sondaı-aq «ABA terapııa» ádistemesi qoldanylady. Ol sóıleý daǵdylary men júris-turystaǵy negizgi daǵdylardy baǵalaýǵa qurylady.
