Astanada aýtızmge shaldyqqan 60-tan asa bala Jańa jyl qarsańynda syılyq aldy
Aýtızmge shaldyqqan búldirshinderge arnaıy jańajyldyq shyrsha toıyn ótkizý bastamasyn aýtızmge shaldyqqan balalar men olardyń ata-analarynyń «Orda» qoǵamdyq birlestigi kótergen. Atalǵan birlestik jaqynda qurylǵan, ata-analar balalarǵa kómek kórsetý úshin kúsh biriktirgen.
«Biz túrli úıirmeler, sektsııalar, sharalar uıymdastyramyz. Búgin ákimdiktiń qoldaýymen osyndaı mereke ótkizdik. Balalarǵa syılyqtar tartý etildi, ákimdiktiń ókilderi ár balanyń nemen áýestenetinin surap, tilekterin bilgisi kelip jatty», - dep málim etti aýtızmge shaldyqqan balalar men olardyń ata-analarynyń «Orda» qoǵamdyq birlestiginiń tóraıymy Saltanat Esmaǵambetova.
Merekege kelgen ata-analardyń biri Saltanat Erjanova óz áserimen bólisti.
«Búgin bizge arnap keremet mereke uıymdastyryldy. Qala ákimi Áset Isekeshevten syılyq alǵanymyzǵa qýanyshtymyz, ulym konstrýktordy burynnan qalap júrgen edi», - deıdi balalardyń biriniń anasy Saltanat Erjanova.
Ol ózi tórt balany tárbıelep otyrǵan kóp balaly ana ekenin jáne bıylǵy jyl syılyqtar men qamqorlyqqa toly bolǵanyn jetkizdi.
««Astana - meıirimdi qala» aktsııasy sheńberinde men bıyl syılyqtar aldym. Bizge kez kelgen kómek - úlken qoldaý. Óte baqyttymyn, úlken rahmet aıtamyn», - dedi S.Erjanova.
«Shara jaqsy ótti, anımatorlar kóterińki kóńil kúı syılady. Qala ákimdigi men «Orda» qoǵamdyq qoryna keremet mereke uıymdastyrǵany úshin alǵys aıtamyz», - dedi qala turǵyny Zarına Dándibaeva.
Jańajyldyq merekege qala ákimi Áset Isekeshev qatysyp, kele jatqan merekemen quttyqtap, Astanada aıryqsha qajettilikteri bar balalarǵa basa nazar aýdarylatynyn habarlady.
Onyń aıtýynsha, kelesi jyly aýtıst-balalardy qoldaýǵa jáne olardy qoǵamǵa kiristirýge arnalǵan arnaıy keshendi baǵdarlamalar ázirlenedi. Elorda basshysy kele jatqan Jańa jylmen quttyqtap, barshaǵa zor densaýlyq, tabys, jaqsylyq tiledi.