Astanada aýtızm taqyrybyndaǵy alǵashqy spektakldiń tusaýkeseri ótti
ASTANA. KAZINFORM — «ÖzgeEpic» kreatıv habynda aýtızm taqyrybyna arnalǵan elimizdegi alǵashqy sahnalyq qoıylym — «Qushtar» spektakliniń tusaýkeseri boldy.
Qoıylym psıhologter, ınklıýzıvti bilim berý mamandary, áleýmettanýshylar men zańgerlerdiń qatysýymen, áleýmettik jáne ǵylymı derekterge súıene otyryp jasalǵan.
Aktrısa Gúlmıra Jakılına spektakldiń ıdeıalyq salmaǵy men daıyndyq barysy týraly aıtty.
— Zertteýden keıin akterlerdi jınap, daıyndyq kezeńin bastadyq. Aýtızm dıagnozy bar balalar men olardyń ata-analaryna qoǵamnyń jyly qabaq tanytýy — bizdiń basty mıssııamyz. Biz jasaǵan isimiz kishkene bolsa da áser etse eken deımiz, — dedi ol.
Spektaklde erekshe balanyń rólin somdaǵan akter Marǵulan Nashanov bul taqyryptyń aýyr bolǵanyn jetkizdi.
— Qıyn sátteri kóp boldy. Eń bastysy — qabyldaý qıyn. Biraq daıyndyq kezinde ata-analardyń ómirlik tájirıbesi bizge kóp kómek boldy. Aýtızm — aýrý emes, álemge basqa qyrynan qaraý dep bilemin, — dedi akter.
Qoıylymnyń rejısseri Shyryn Mustafına bul týyndynyń kásibı jolyndaǵy erekshe beles ekenin atap ótti.
— Bul taqyryp bizge basqa álemdi tanytty. Árbir daıyndyqta akterler keıipkerlerin júrekpen sezindi. Men ózim de reabılıtatsııalyq ortalyqtarǵa baryp, balalardy zerttedim. Olardyń álemin túsiný — spektakldiń ózegi boldy, — deıdi rejısser.
Premera sońynda kórermen qoıylym taqyryby boıynsha talqylaýǵa qatysyp, qoǵamdaǵy ınklıýzııa men túsinistik máselelerin birge saralady.
Joba «ÖzgeEpic» kreatıv habynyń, Senat janyndaǵy Sarapshylar klýby men «Taldaý mektebi» túlekteri birigip qurǵan Creativity Support Team — Kreatıvti qoldaý tobynyń bastamasymen júzege asqan.
Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵynyń basshysy Maqpal Jumabaıdyń aıtýynsha, jobanyń daıyndyq kezeńi 8 aıdan astam ýaqytqa sozylyp, 20-dan astam túrli salanyń mamandary qatysty.
Aıta keteıik, Astanada aýtızmmen aýyratyn 2000-daı bala bar.