Astanada Aýrýhanalyq basqarý júıesindegi alǵashqy menedjerlerge dıplomdar tabys etildi

MVA baǵdarlamasy - Qazaqstan Prezıdentiniń densaýlyq saqtaý salasynyń menedjerlerin daıyndaý tapsyrmasyna sáıkes ázirlendi. Baǵdarlamanyń ilki jobasy 2009 jyly júzege asyryla bastady, alǵashqy oqýlarǵa 20 adam qabyldandy.

Astana medıtsınalyq ýnıversıtetiniń joǵary bilimnen keıingi sektor dekany Dınara Jarylǵanovanyń aıtýynsha, úmitkerlerdiń sany óte kóp boldy. Olardy irikteý barysynda qoıylǵan basty talap - joǵary eńbek ótili jáne aǵylshyn tilin jetik bilýi. Oqýǵa medıtsınalyq, ekonomıkalyq, farmatsevtıkalyq jáne zań salasynyń mamandary qabyldandy.

Baǵdarlama aıasynda Astana medıtsınalyq ýnıversıtetinde, L.Gýmılev atyndaǵy Eýrazııa Ulttyq ýnıversıtetinde, Sıngapýr men Avstrııa elderindegi joǵary mektepterde oqýlar ótti. Bolashaq menedjerler, sondaı-aq Nıý-Iorktegi Kolýmbııa ýnıversıtetinde 10 kún boıy tájirıbe jınaqtady. Bilim alýshylar ózge elderdiń densaýlyq saqtaý mekemelerindegi basqarý júıelerimen tanysqannan keıin elge oralyp, Ulttyq medıtsınalyq holdıngi bazasynda tájirıbeden ótti. Onyń nátıjesi boıynsha dıssertatsııalaryn jazdy. Bilim berý jalpy 1,5 jylǵa sozyldy jáne tolyǵymen memlekettik bıýdjet esebinen qarjylandyryldy.

«Aýrýhanalyq basqarýdaǵy iskerlik ákimshilik sheberlerin daıyndap shyǵaratyn baǵdarlamanyń TMD aýmaǵynda teńdesi joq. Aýrýhanalyq basqarý júıesin Qazaqstan alǵashqy bolyp ázirledi», - dedi ol.

D.Jarylǵanovanyń sózine qaraǵanda, túlekterge búginniń ózinde suranys óte joǵary. Olar Ulttyq medıtsınalyq holdıngi, qalalyq jáne respýblıkalyq deńgeıdegi emhanalar men aýrýhanalarǵa jumysqa ornalastyrylatyn bolady. «Aýrýhanalyq basqarý júıesin jetildirý» memlekettik baǵdarlamasy boıynsha oqytýdyń ekinshi kezeńine bıyl 15 adam qabyldandy.