Astanada aýrýhanaǵa jatqyzylǵan 5 jastaǵy qyzdyń týystaryna izdeý salyndy
ASTANA. QazAqparat - Astana bilim basqarmasy aýrýhanaǵa jatqyzylǵan bes jasar qyzdy úıine jiberý máselesi boıynsha jumys istep jatyr, dep habarlaıdy QazAqparat elordalyq basqarmanyń baspasóz qyzmetine silteme jasap.
Vedomstvo basshysy Ánýar Janǵozınniń aıtýynsha, Qazaqstanda zań boıynsha árbir bala otbasynda ómir súrý jáne tárbıelený quqyǵyna ıe. Sonymen qatar qamqorlyqsyz qalǵan balalardy úıge ornalastyrýdyń otbasylyq formasyna basymdyq beriledi.
«Imıral Sádýaqasova ata-ananyń qamqorlyǵynsyz qalǵandyqtan (anasy tergeý ızolıatorynda, ákesi belgisiz), qazirgi kezde balany úıge ornalastyrý boıynsha jumystar júrip jatyr, ıaǵnı anasy jaǵynan týystary izdestirilýde», - deıdi ol.
Á. Janǵozın bilim basqarmasy bul máseleniń erekshe qadaǵalaýda ekenin tilge tıek etti.
«Qyzǵa mindetti túrde áleýmettik kómek jáne qoldaý kórsetiledi», - dedi ol.
Eske sala keteıik, 3 naýryz kúni Qýat Ahmetjanov Qazaqstan Respýblıkasyndaǵy bala quqyqtary jónindegi ýákildiń Feısbýktegi paraqshasynda uryp-soǵý belgilerimen №2 qalalyq balalar aýrýhanasyna túsken kishkentaı qyz týraly WhatsApp messendjerinen kelgen habarlama men sýretin jarııalaǵan bolatyn.
Aýrýhanadaǵylar qyzdyń esin tanıtynyn aıtady. Denesiniń kógergen jerleri birte-birte aıyǵyp keledi. Bala oınaıdy, ystyǵy kóterilmegen, suraqtarǵa jaýap beredi, onymen psıhologtar jumys istep jatyr.
Soqqyǵa jyǵylǵan bes jasar qyzdyń taǵdyryn Qazaqstan Respýblıkasyndaǵy Bala quqyqtary jónindegi ýákil, Parlament depýtaty Zaǵıpa Balıeva óz baqylaýyna aldy.
Foto: 42.rodina.news
