Astanada aýqymdy jalpyqalalyq senbilik bastaldy
ASTANA. KAZINFORM — «Taza Qazaqstan. Astana — tazalyq pen tártiptiń úlgisi» atty keń aýqymdy ekologııalyq aktsııa aıasynda 11 qazan kúni tańerteń elordada jalpyqalalyq senbilik bastaldy, dep habarlaıdy qala ákimdiginiń resmı saıty.
Oǵan qala turǵyndary, eńbek ujymdary, memlekettik organdar qyzmetkerleri, shaǵyn jáne orta bıznes sýbektileri (bazarlar, saýda-oıyn-saýyq ortalyqtary, kafe, meıramhanalar jáne basqalar), volonterler, máslıhat depýtattary, úkimettik emes uıymdar, mádenıet jáne sport qaıratkerleri, sondaı-aq PIK (MIB) ókilderi jáne basqa da uıymdar qatysyp jatyr.
Ekoaktsııa aıasynda Astanada qala aýmaǵyn sanıtarlyq tazalaý, nóser jáne aryq júıelerin tazartý, kóshelerdi, trotýarlardy, aýlalar men qoǵamdyq keńistikterdi jınaý jumysy júrgizilip jatyr.
Sonymen qatar jasyl jelekterdi kútip-baptaý jáne otyrǵyzý boıynsha maýsymdyq agrotehnıkalyq jumystar, saýda nysandaryna irgeles aýmaqtardy tazalaý, ruqsatsyz qoqys úıindilerin joıý jáne basqa da sharalar ótýde.
Qala turǵyndary elordanyń tazalyǵy men tártibin saqtaý isine belsendi atsalysyp jatyr. Turǵyndar aýla bolyp birigip, óz aýdandarynda tazalyq júrgizip jatyr.
— Ujym bolyp, dúkenimizdiń mańaıyndaǵy aýmaqty tazalaýǵa shyqtyq: trotýarlardy, avtoturaqty, gúlzarlar men kógaldardy qoqystan, qýraǵae butaqtar men japyraqtardan tazarttyq. Mundaı aktsııalar tek tazalyq ornatýǵa ǵana emes, sonymen qatar bıznestiń aınalasynda jaılylyqty qalyptastyrýǵa kómektesedi, bul jerde ári klıentterge, ári qyzmetkerlerge jaǵymdy bolmaq, — dedi aktsııa qatysýshylarynyń biri, dúken ıesi.
Aýqymdy tazalyq jumysy aıasynda elordanyń barlyq alty aýdanynda aǵash otyrǵyzyldy.
— Búgin biz dostarymyzben birge ózimizdiń alǵashqy aǵashymyzdy otyrǵyzdyq, bul jaı ǵana senbilikke qatysýdan áldeqaıda áserli eken. Adam óz qolymen otyrǵyzǵan aǵashtyń qalamen birge ósetinin oılaýdyń ózi erekshe sezim. Biz ekologııa men tazalyq týraly jıi aıtamyz, al búgin osy baǵytta naqty qadam jasap otyrmyz, — dep áserin jetkizdi JOO stýdenti.
Budan buryn «Taza Qazaqstan» aktsııa aıasynda astanalyqtardan onlaın-platformaǵa 3000-nan asa ótinim tústi.